Улсын Их Хурлын Төсвийн байнгын хорооны 2026.06.29-ний өдрийн хуралдаанаар 2027 онд Төрийн аудитын байгууллагаас хийх “Аудитын сэдэв батлах тухай” тогтоолын төслийг хэлэлцлээ. Төрийн аудитын байгууллагын 2027 онд гүйцэтгэх аудитын сэдвийн талаарх танилцуулгыг Монгол Улсын Ерөнхий аудитор С.Магнайсүрэн танилцуулав. Тэрбээр танилцуулгадаа, Аудитын сэдвийг боловсруулахдаа улсын хөгжлийн бодлогыг хэрэгжүүлэхэд тулгамдаж буй асуудлыг тодорхойлж, түүнийг шийдвэрлэхэд дэмжлэг үзүүлэх, Засгийн газрын үйл ажиллагааны хөтөлбөрийн хэрэгжилт, төрийн санхүү, төсвийн хөрөнгийн хяналтыг сайжруулах, энэ үйл ажиллагаанд гарах эрсдэлийг тодорхойлон түүнийг бууруулах, иргэд, олон нийтийн ашиг сонирхлыг харгалзах, аудитын үр дүнгээр иргэдийн амьдралын чанарыг дээшлүүлэх зорилгоор хэд хэдэн эх сурвалжаас ирүүлсэн санал, өөрсдийн цуглуулсан мэдээлэл зэргийг үндэслэн тодорхойлсон.   2027 онд Төрийн аудитын байгууллага Монгол Улсын хууль тогтоомжоор хүлээсэн үүргийнхээ дагуу хуулийн дагуу гүйцэтгэх 23, төрийн аудитын бодлогоор гүйцэтгэх 12 нийт 35 сэдэвт аудит хийхээр танилцууллаа. “Төрийн аудитын байгууллагын 2027 онд гүйцэтгэх аудитын сэдэв батлах тухай” Байнгын хорооны тогтоолын төслийг батлах, эсэх санал хураалтыг явуулахад хуралдаанд оролцсон гишүүдийн 73.7 хувь нь дэмжив.

Үргэлжлүүлэн Төрийн аудитын байгууллагын 2027 оны төсвийн төслийн талаар хэлэлцлээ. Төрийн аудитын байгууллага нь Төсвийн тухай хуульд заасны дагуу жил бүр төсвийн төслөө боловсруулж, улсын төсөвт нэгтгүүлэхээр санхүү, төсвийн асуудал эрхэлсэн төрийн захиргааны төв байгууллагад хүргүүлдэг боловч байнга хасагдаж батлагдсаар ирсэн. Тухайлбал, сүүлийн долоон жилд дунджаар 13 хувиар хасагдсан гэдгийг Монгол Улсын Ерөнхий аудитор С.Магнайсүрэн онцоллоо. Мөн Төрийн аудитын байгууллагын 2027 оны төсвийн төслийг цалин хөлс, нийгмийн даатгалын шимтгэл, тогтмол зардал, аудитын үйл ажиллагааны зардал, мэдээллийн технологийн шинэчлэл, ахмадын сан болон хөрөнгө оруулалтын зардлыг тооцон төлөвлөсний 66.4 хувь нь урсгал зардал, 33.6 хувь нь хөрөнгийн зардал эзэлж байгаа юм. Хуралдаан даргалагчаас Улсын Их Хурлын гишүүдээс төрийн аудитын байгууллагын 2027 оны төсвийн төслийг хэлэлцэх явцад гарсан саналуудыг тусган, уг төслийг санхүү, төсвийн асуудал эрхэлсэн төрийн захиргааны төв байгууллагад хүргүүлэхийг дэмжих санал хураалт явуулахад хуралдаанд оролцсон гишүүдийн олонх нь дэмжлээ.