Төрийн аудитын байгууллага 2026 оныг "Аудитын нөлөөллийг тооцох, үнэлэх тогтолцоог төлөвшүүлэх" жил болгон зарлаж, аудитын шийдвэрийн хэрэгжилтийг эрчимжүүлэх чиглэлээр үе шаттайгаар авч хэрэгжүүлж буй арга хэмжээний хүрээнд Төсвийн ерөнхийлөн захирагчидтай уулзалт-хэлэлцүүлэг зохион байгуулж байна. Өнөөдөр (2026.07.06) Үндэсний аудитын газрын Аудитын шийдвэрийн хэрэгжилтийн газраас Гэр бүл, хөдөлмөр, нийгмийн хамгааллын салбарт хамаарах аудитын шийдвэрийн хэрэгжилтийг эрчимжүүлэх уулзалт-хэлэлцүүлгийг зохион байгууллаа. 
Уулзалт-хэлэлцүүлэгт Гэр бүл, хөдөлмөр, нийгмийн хамгааллын сайд Г.Аубакир, тус яамны Төрийн нарийн бичгийн дарга А.Даваажаргал, Үндэсний аудитын газрын холбогдох албан тушаалтнууд болон Нийгмийн даатгалын ерөнхий газар, Хөдөлмөр, халамжийн үйлчилгээний ерөнхий газар, Хүүхэд, гэр бүлийн хөгжил хамгааллын ерөнхий газар, Хөгжлийн бэрхшээлтэй хүний хөгжлийн ерөнхий газар болон тэдгээрийн аймаг, нийслэл дэх харьяа газруудын төсөв захирагчид, төсөв санхүүгийн асуудал хариуцсан удирдах албан тушаалтнууд оролцов. 
Уулзалт-хэлэлцүүлгийг нээж Үндэсний аудитын газрын Аудитын шийдвэрийн хэрэгжилтийн газрын захирал, тэргүүлэх аудитор Ч.Цэвэгдорж Төрийн аудитын байгууллагаас гүйцэтгэсэн аудитаар тогтоосон төлбөрийн акт, өгсөн албан шаардлага, зөвлөмжийн хэрэгжилтийн нөхцөл байдал, хэрэгжилтийг эрчимжүүлэх хэрэгцээ шаардлага, хэрэгжилт хангалтгүй, хугацаа хэтэрсэн аудитын шийдвэрүүдийг хэрэгжүүлж ажиллахгүй бол цаашид хариуцлага тооцуулах хууль, эрх зүйн үр дагавар гарч болзошгүй талаар онцлон дурдсан. Танхим, цахим хосолсон хэлбэрээр зохион байгуулагдсан тус уулзалт-хэлэлцүүлгээр гэр бүл, хөдөлмөр, нийгмийн хамгааллын салбарын хэмжээнд аудитаар илэрч буй алдаа зөрчлийн нийтлэг шалтгаан, нөхцөлийг дурдаад, аудитын шийдвэрийн хэрэгжилтийг Төрийн аудитын байгууллагын цахим системээр дамжуулан хянаж үнэлэх асуудлуудыг танилцууллаа. Үргэлжлүүлэн уулзалт-хэлэлцүүлэгт оролцсон гэр бүл, хөдөлмөр, нийгмийн хамгааллын салбарын холбогдох албан тушаалтнууд аудитын шийдвэрийн хэрэгжилт, түүнийг хянаж үнэлэхэд тулгамдаж буй асуудал болон алдаа зөрчлийг давтан гаргахгүй байхад анхаарах шаардлагатай асуудлуудыг хөндөн хэлэлцүүлэг өрнүүлсэн юм.
