Монгол Улсын Их Хурлаас 2023 оны 05 дугаар сарын 04-ний өдөр Төрийн албан хаагчийн ёс зүйн тухай хуулийг баталсан.

Дээрх хууль батлагдсантай холбогдуулан Монгол Улсын Ерөнхий аудиторын 2021 оны 04 дүгээр сарын 13-ны өдрийн А/52 дугаар тушаалаар “Төрийн аудитын байгууллагын албан хаагчийн ёс зүйн дүрэм”-д Монгол Улсын Ерөнхий аудиторын тушаалаар нэмэлт, өөрчлөлт оруулахаар тушаалын төсөл боловсрууллаа. 

Та Монгол Улсын Ерөнхий аудиторын тушаалаар батлагдсан “Төрийн аудитын байгууллагын албан хаагчийн ёс зүйн дүрэм”-д нэмэлт, өөрчлөлт оруулах тухай доорх тушаалын төсөлтэй танилцаж, саналаа 2026 оны 03 дугаар сарын 09-ны өдрийн дотор Үндэсний аудитын газрын info@audit.gov.mn цахимаар хаягаар ирүүлнэ үү. 

МОНГОЛ УЛСЫН

 ЕРӨНХИЙ АУДИТОРЫН

ТУШААЛ

Төрийн аудитын байгууллагын албан хаагчийн

Ёс зүйн дүрэмд нэмэлт, өөрчлөлт оруулах тухай

            Төрийн аудитын тухай хуулийн  26 дугаар зүйлийн 26.2 дахь хэсэг, 29 дүгээр зүйлийн 29.1.3 дахь заалт, 29.3 дахь хэсгийг тус тус үндэслэн ТУШААХ нь:

1.     Монгол Улсын Ерөнхий аудиторын 2021 оны 04 дүгээр сарын 13-ны өдрийн А/52 дугаар тушаалаар баталсан “Төрийн аудитын байгууллагын албан хаагчийн ёс зүйн дүрэм”-д дор дурдсанаар нэмэлт, өөрчлөлт оруулсугай.

1.1/Дүрмийн 5 дугаар зүйлийн 5.4 дэх хэсгийн “ёс зүйн зөвлөлд” гэснийг “ёс зүйн дэд хороонд” гэж өөрчилсүгэй.

1.2/Дүрмийн 6 дугаар зүйлийн 6.1 дэх хэсгийн “нөлөөлөх, нөлөөлөхөөр оролдохгүй байвал зохино.” гэсний дараа “Ийнхүү үйлдэл гаргасан тохиолдолд албан хаагчид хувийн сонирхлын бүртгэл хөтлөгдөнө.” гэж нэмсүгэй.

1.3/Дүрмийн 6 дугаар зүйлийн 6.1.1-д “Энэ дүрмийн 6.1-т заасныг зөрчсөн тохиолдолд албан хаагчид хувийн сонирхлын бүртгэл хөтлөгдөх бөгөөд холбогдох шалгалтын ажиллагааг Хяналт-шинжилгээ, үнэлгээ дотоод аудит хариуцсан нэгжээс явуулна.” гэснийг, 6.1.2-т “Хяналт-шинжилгээ, үнэлгээ дотоод аудит хариуцсан нэгж шалгалтын дүнг Ёс зүйн зөвлөлд танилцуулна” гэснийг тус тус хассугай.

1.4/Дүрмийн 13 дугаар зүйлийн 13.1 дэх хэсгийг “Төрийн аудитын байгууллагын албан хаагчийг ёс зүйн зөрчил гаргасан тухай Ёс зүйн дэд хорооны дүгнэлтийг үндэслэн Төрийн албаны тухай хуульд заасан сахилгын шийтгэл, эсхүл Төрийн албан хаагчийн ёс зүйн тухай хуульд заасан ёс зүйн хариуцлага хүлээлгэх эсэхийг Монгол Улсын Ерөнхий аудитор шийдвэрлэнэ.” гэж өөрчлөн найруулсугай. 

2.Төрийн аудитын байгууллагын албан хаагчийн ёс зүйн дүрэмд оруулсан нэмэлт, өөрчлөлтийг захиргааны хэм хэмжээний актын улсын нэгдсэн санд бүртгүүлж, холбогдох хөдөлгөөн хийлгэхийг Үндэсний аудитын газрын Тамгын газар (Б.Бундхорол)-т үүрэг болгосугай.

3.Тушаалын хэрэгжилтэд хяналт тавьж ажиллахыг Чанарын удирдлага, эрсдэлийн газар (Я.Самбууням)-т даалгасугай.

 С.МАГНАЙСҮРЭН