Үндэсний аудитын газраас өнөөдөр (2026.08.07) Төрийн аудитын байгууллагын 2027 оны төсвийн төслийг олон нийтэд танилцуулж, нээлттэй хэлэлцүүлэг өрнүүллээ. Төсвийн тухай хуульд заасны дагуу зохион байгуулсан уг хэлэлцүүлэгт Сангийн яам, Төсвийн тогтвортой байдлын зөвлөл, хэвлэл мэдээлэл, иргэний нийгмийн байгууллагын төлөөлөл, иргэд олон нийт оролцлоо. Хэлэлцүүлгийн эхэнд Үндэсний аудитын газрын Тамгын дарга, Тэргүүлэх аудитор Б.Бундхорол Төрийн аудитын байгууллагын төсвийн төсөл, хэрэгжүүлэх арга хэмжээ, үүсээд буй нөхцөл байдлын талаар мэдээлэл өглөө. 

Төрийн аудитын байгууллага нь Төсвийн тухай хуульд заасны дагуу жил бүр төсвийн төслөө боловсруулж, улсын төсөвт нэгтгүүлэхээр санхүү, төсвийн асуудал эрхэлсэн төрийн захиргааны төв байгууллагад хүргүүлдэг боловч байнга хасагдаж батлагдсаар ирсэн. Мөн 2025 онд төрийн албан хаагчдын цалинг 15 хувиар нэмэгдүүлэх шийдвэр хэрэгжихэд Төрийн аудитын байгууллага хамрагдаагүй, орхигдсон. Үүнээс гадна улсын төсвийн тодотголоор зарим зардлыг үлэмж хэмжээгээр бууруулсан нь техник, тоног төхөөрөмжийн дутагдалд орж үйл ажиллагаагаа хэвийн үргэлжлүүлэхэд нөлөөлөх хэмжээнд хүрснийг тэрбээр онцоллоо.  

Энэ нь төрийн аудитын үндсэн зорилт болох төрийн санхүү, төсөв, нийтийн өмчийг төрийн байгууллагууд хууль ёсны дагуу арвилан хэмнэлттэй, үр нөлөөтэй зарцуулж байгаа эсэхэд хяналт тавьж, тулган баталгаажуулах боломжийг зарим талаар хааж байгааг Тамгын дарга Б.Бундхорол тайлбарлалаа. Оролцогчдын зүгээс аудитын чиг үүрэг өсөж байгаа ч, аудитын тайлан, дүгнэлтийг олон нийтэд хүртээмжтэй хүргэх, үйл ажиллагаандаа цахим технологийг нэвтрүүлэх зардлыг орхигдуулахгүй байх зэрэг саналыг хэлж байлаа. Хэлэлцүүлгээс гарсан болон цахимаар ирсэн саналуудыг нэгтгэн холбогдох байгууллагуудад хүргүүлнэ. Мөн төрийн аудитын байгууллагын 2027 оны төсвийн төсөлд өгөх цахим саналыг энэ сарын 10-ны өдрийг хүртэл хүлээн авна.