Бүгд Найрамдах Турк Улсын Тооцооны шүүхийн Ерөнхийлөгч Метин Йенер тэргүүтэй төлөөлөгчид Монгол Улсын Төрийн аудитын байгууллагад ажлын айлчлал хийж байна. Өнөөдөр Монгол Улсын Ерөнхий аудитор С.Магнайсүрэн төлөөлөгчдийг хүлээн авч уулзлаа. Уулзалтад БНТУ-аас Монгол Улсад суугаа Онц бөгөөд Бүрэн эрхт Элчин сайд Башак Гэнч Юксэл, ТИКА-гийн Улаанбаатар дахь хөтөлбөр зохицуулагч Мустафа Бутун болон бусад албаны төлөөлөл оролцов. Уулзалтын үеэр Монгол Улс, БНТУ-ын аудитын дээд байгууллагуудын хамтын ажиллагаа, сайн туршлага солилцох, албан хаагчдын мэргэжлийн чадавхыг бэхжүүлэх, хамтарсан сургалт зохион байгуулах зэрэг асуудлаар санал солилцлоо. БНТУ-ын Тооцооны шүүхийн Ерөнхийлөгч Метин Йенер энэ оны хоёрдугаар сард шинэчлэн байгуулсан Хамтран ажиллах тухай харилцан ойлголцлын санамж бичгийн хүрээнд хэрэгжүүлэх ажлуудаа эрчимжүүлэх зорилгоор Монгол Улсад айлчилж буйг онцлов. Мөн тус шүүхийн хэрэгжүүлж буй хиймэл оюун ухаанд суурилсан дижитал шилжилтийн туршлагаа Монгол Улсын Төрийн аудитын байгууллагатай хуваалцах болон хамтын ажиллагааны ТИКА байгууллагын шугамаар хэрэгжүүлэх төслийг ажил хэрэг болгоход бэлэн байгаагаа илэрхийлэв. 
Монгол Улсын Ерөнхий аудитор С.Магнайсүрэн Төрийн аудитын байгууллагын стратегийн цөм нь аудитын үйл ажиллагааг цахимжуулах, хиймэл оюун ухааныг нэвтрүүлэх, аудитын шийдвэрийн хэрэгжилтийг сайжруулах, албан хаагчдын чадавхыг бэхжүүлэхэд чиглэж байгааг онцлоод, энэ чиглэлээр БНТУ-ын Тооцооны шүүхийн туршлагаас суралцах, хамтран ажиллах боломж их байгааг тэмдэглэлээ. БНТУ-ын Тооцооны шүүх нь 1862 онд байгуулагдсан, төрийн санхүүгийн хяналтын чиглэлээр 160 гаруй жилийн түүхтэй байгууллага юм. Тус шүүх нь санхүү, нийцэл болон гүйцэтгэлийн аудит хийхийн зэрэгцээ аудитын явцад илэрсэн улсын төсөвт учирсан хохиролтой холбоотой асуудлыг шүүн таслах чиг үүрэг хэрэгжүүлдгээрээ онцлогтой.
