Үндэсний аудитын газар Засгийн газраас агаар, орчны бохирдлыг бууруулах чиглэлээр 2022-2025 онд хэрэгжүүлсэн арга хэмжээний хэрэгжилт, үр дүнд гүйцэтгэлийн аудитыг хийж эхэллээ. Аудитаар агаар, орчны бохирдлыг бууруулах чиглэлээр оновчтой бодлого тодорхойлж, шаардлагатай нөөцийг бүрдүүлсэн эсэх, мөн энэ чиглэлээр зарцуулсан төсөв, хөрөнгө нь бодит үр дүнд хүрч, хүрээлэн буй орчинд эерэг өөрчлөлт бий болгосон эсэхийг үнэлж, дүгнэх юм.
Аудитын хүрээнд Засгийн газраас 2017 онд баталсан “Агаар, орчны бохирдлыг бууруулах үндэсний хөтөлбөр”, Байгаль орчин, аялал жуулчлалын сайдын 2017 онд баталсан “Агаар, орчны бохирдлыг бууруулах үндэсний хөтөлбөрийг хэрэгжүүлэх арга хэмжээний төлөвлөгөө”, НИТХ-ын 2018 онд баталсан “Нийслэлийн агаарын бохирдлыг бууруулах мастер төлөвлөгөө”-г хэрэгжүүлэх үүрэг бүхий төрийн захиргааны төв байгууллага болон түүний харьяа байгууллагуудын үйл ажиллагааг холбогдох баримт, материалд тулгуурлан үнэлэх юм. Аудитын нээлтийг Үндэсний аудитын газрын Гүйцэтгэлийн аудитын газрын захирал, Тэргүүлэх аудитор Д.Энхболд хийж, шалгагдагч байгууллагын холбогдох албан хаагчдад аудитын зорилго, хамрах хүрээ, төлөвлөгөө болон хэрэгжилтийн явцад анхаарах асуудлуудын талаар мэдээлэл өглөө.
