Соёл, спорт, аялал жуулчлал, залуучуудын салбарт хамаарах аудитын шийдвэрийн хэрэгжилтийг эрчимжүүлэх уулзалт-хэлэлцүүлэг зохион байгууллаа
Үндэсний аудитын газраас аудитын шийдвэрийн хэрэгжилтийг эрчимжүүлэх, үр дүнг сайжруулах чиглэлээр үе шаттай арга хэмжээ авч байна. Энэ хүрээнд төсвийн ерөнхийлөн захирагчидтай уулзалт-хэлэлцүүлэг зохион байгуулж, аудитын шийдвэрийн хэрэгжилтийн явц, тулгамдаж буй асуудал, цаашид хэрэгжүүлэх арга хэмжээний талаар хэлэлцэж, Соёл, спорт, аялал жуулчлал, залуучуудын салбарт хамаарах аудитын шийдвэрийн хэрэгжилтийг эрчимжүүлэх уулзалт-хэлэлцүүлгийг зохион байгууллаа.
Уулзалт-хэлэлцүүлгийн үеэр тус салбарт Төрийн аудитын байгууллагаас гүйцэтгэсэн аудитаар тогтоосон төлбөрийн акт, хүргүүлсэн албан шаардлага, зөвлөмжийн хэрэгжилтийн өнөөгийн нөхцөл байдал, хэрэгжилтийг эрчимжүүлэх шаардлага, цаашид анхаарах асуудлын талаарх мэдээллийг Үндэсний аудитын газрын Аудитын шийдвэрийн хэрэгжилтийн газрын Аудитын менежер С.Энхбаатар өгсөн юм. Биеийн тамир, спортын улсын хороо, Соёл урлагийн газар, тэдгээрийн орон нутаг дахь харьяа газрууд, музей, театрууд, сумдын соёлын төв зэрэг тус яамны харьяа байгууллагын удирдлага, нягтлан бодох бүртгэлийн ажилтнууд, дотоод аудитын нэгжийн албан хаагчид зэрэг нийт 252 оролцогч уулзалт-хэлэлцүүлэгт хамрагдсан. Салбарын хэмжээнд аудитаар илэрч буй алдаа зөрчлийн нийтлэг шалтгаан, нөхцөл, аудитын шийдвэрийн хэрэгжилтийг Төрийн аудитын байгууллагын цахим системээр дамжуулан хянаж үнэлэх асуудлуудыг танилцуулсан бөгөөд уулзалтын үеэр оролцогчдоос ирсэн асуулт, шийдвэрийг хэрэгжүүлэхэд тулгамдаж буй асуудлын талаар санал солилцож хариулт өглөө. Мөн тухайн жилийн батлагдсан төсөвт багтаан зарцуулалт хийхэд тулгарч буй хүндрэл бэрхшээл, өр, авлагын асуудал, хүний нөөцийн бүрдүүлэлт, өмч хөрөнгийн бүртгэл, ашиглалттай холбоотой асуудлуудын талаар санал солилцов.
