Хууль тогтоомжийн тухай хуулийн 51.2-т “Хууль тогтоомжийн хэрэгжилтийн үр дагаварт хийх үнэлгээг энэ хуулийн 12.1.6-д заасан аргачлалын дагуу хийнэ” гэж, 51.3-т “Энэ хуульд өөрөөр заагаагүй бол хууль тогтоомжийн хэрэгжилтийн үр дагаварт хийх үнэлгээг тухайн хууль тогтоомжийг дагаж мөрдсөнөөс хойш 5 жил тутамд хийх бөгөөд шаардлагатай тохиолдолд дээрх хугацаанаас өмнө хийж болно” гэж тус тус заасан. Төрийн аудитын тухай хуулийн хэрэгжилтийн үр дагаврыг үнэлэх ажлыг Засгийн газрын 2016 оны 59 дүгээр тогтоолын 6 дугаар хавсралтаар баталсан “Хууль тогтоомжийн хэрэгжилтийн үр дагаварт үнэлгээ хийх аргачлал”-ын дагуу гүйцэтгэлээ. Судалгаа явуулах хүрээг тогтоох зорилгоор хуулийн хэрэгжилттэй холбоотой мэдээлэл, баримт, судалгааны тайланг төрийн аудитын байгууллагаас урьдчилсан авч дүн шинжилгээ хийснээр Төрийн аудитын тухай хуулийн үнэлгээнд хамрагдах заалтуудыг тодорхойлж, харгалзах шалгуур үзүүлэлтийг сонгон томьёолсон. Судалгааг гүйцэтгэхдээ эрх зүйн харьцуулалтын арга, шүүхийн практик судлах, судалгааны тайлан, статистикийн тоо баримтад дүн шинжилгээ хийх, бусад улсын эрх зүйн зохицуулалтыг судлах зэрэг аргыг ашиглав.