Үндэсний аудитын газар “Уул уурхайн нөхөн сэргээлтийн сангийн үйл ажиллагаа, үр дүн, үр нөлөө” сэдэвт нийцлийн аудитын нээлтийг өнөөдөр хийлээ.
Аудитаар уул уурхайн нөхөн сэргээлтийн баталгааны тусгай дансны талаарх үйлчилж байгаа хууль тогтоомж, үйл ажиллагааны тогтолцоо нь үр нөлөөтэй эсэх, тусгай дансанд орлогыг бүрэн төвлөрүүлж уг хөрөнгийг зориулалтын дагуу зарцуулсан эсэхийг тодорхойлох зорилготой байгаа юм. Мөн нөхөн сэргээлт үр дүнтэй хийж байгаа эсэхийг тодорхойлохыг зорьж байна.
Аудитыг Байгаль орчин, Уур амьсгалын өөрчлөлтийн яам, Аж үйлдвэр эрдэс, баялгийн яам, Сангийн яам, Ашигт малтмал газрын тосны газар, Байгаль орчны судалгаа шинжилгээний төв, Газар зохион байгуулалт, геодези, зураг зүйн ерөнхий газар, Үндэсний геологийн алба, Аймаг, нийслэлийн байгаль орчны газар, бүх шатны Засаг даргын Тамгын газар, төсөл хэрэгжүүлэгч болон мэргэжлийн байгууллагууд, хуульд заасан бусад байгууллагыг хамруулан гүйцэтгэнэ. Тэгэхдээ дээрх байгууллагуудын уул уурхайн нөхөн сэргээлтийн баталгааны тусгай дансны 2020-2025 оны орлого, зарлага, тайлан, мэдээ, судалгаа, шинжилгээ, гаргасан шийдвэрүүд болон бусад баримт материалын хүрээнд аудит хийнэ.
Үндэсний аудитын газрын Гүйцэтгэл нийцлийн аудитын газрын захирал, Тэргүүлэх аудитор Д.Энхболд аудитын нээлтийг эхлүүлж, аудитын төлөвлөгөө болон аудитын явцад анхаарах шаардлагатай зарим асуудлаар зөвлөмж өгсөн юм. Энэхүү аудитын тайланг долдугаар сарын 4-ний дотор батлуулж, Монгол Улсын Их Хуралд хүргүүлнэ гэдгийг тэрбээр тодотголоо.
