ХЭНТИЙ АЙМГИЙН 2021 ОНЫ НЭГДСЭН ТӨСВИЙН ТӨСӨЛД ДҮГНЭЛТ ГАРГАЖ АЙМГИЙН ИТХ-Д ХҮРГҮҮЛЛЭЭ

Аймгийн ТЕЗ-аас аймгийн ИТХ-д өргөн мэдүүлсэн Хэнтий аймгийн 2021 оны нэгдсэн төсвийн төсөлд Төрийн аудитын тухай хуулийн 6 дугаар зүйлийн 6.3.2-т “…..аймаг, нийслэлийн Засаг даргаас тухайн шатны иргэдийн Төлөөлөгчдийн Хуралд өргөн мэдүүлсэн жилийн төсвийн төсөлд  төсвийн орлого нэмэгдүүлэх, төсвийн зарлагыг бууруулах, төсвийн санхүүжилтийн үр ашгийг дээшлүүлэх талаар дүгнэлт гаргаж ….аймаг, нийслэлийн иргэдийн Төлөөлөгчдийн Хуралд хүргүүлэх” гэж заасны дагуу аймаг дахь Төрийн аудитын газар нь дүгнэлт гаргаж, аймгийн Иргэдийн төлөөлөгчдийн хуралд  2020 оны 11 дүгээр сарын 30-ний өдөр хүргүүллээ.

2021 оны орон нутгийн төсвийн орлогын эх үүсвэрийг 3,150.0 сая төгрөгөөр нэмэгдүүлэх боломжтой гэж үзлээ. Үүнд:

  • Дуудлага худалдаа сонгон шалгаруулалтын орлого – 150.0 сая төгрөг
  • Үйлдвэрлэл үйлчилгээний зориулалтаар ашигласан ус, ашигласны төлбөрийн орлого – 250.0 сая төгрөг
  • Бусад орлого -100.0 сая төгрөг
  • Хог хаягдлын үйлчилгээний хураамж -200.0 сая төгрөг
  • Ойн нөөц ашигласны төлбөр – 50.0 сая төгрөг
  • Түгээмэл тархацтай ашигт малтмал ашигласны төлбөр – 50.0 сая төгрөг
  • Төрийн сангийн 2020 оны үлдэгдэл-2.350,0 сая төгрөг

 

Төсвийн  хөрөнгийг урсгал зардалд  711.1 сая төгрөгөөр үр ашиггүй төлөвлөсөн байна. Үүнд:

   Орон тоо, цалингийн санд 65.1 сая төгрөг, аймгийн ИТХ-ын төлөөлөгчдийн тойрогт ажиллах зардал буюу хуралд суудалтай намд олгох дэмжлэгт 156.0 сая төгрөг, бусад дэмжлэгт 30.0 сая төгрөг, Засаг даргын мөрийн хөтөлбөрийг хэрэгжүүлэхэд 460.0 сая төгрөгийн үндэслэл тооцоолол хангалтгүй төлөвлөсөн нь, Төсвийн тухай хуулийн 6 дугаар зүйлийн 6.4.1 ”Төсвийг үр ашигтай, хэмнэлттэй байхаар төлөвлөж, зарцуулах” гэсэн зарчимтай нийцэхгүй байна.

     Өмнөх  оноос шилжүүлэн төсөвт тусгаж байгаа аймгийн ОНХС-ийн хөрөнгөөр   хэрэгжих Чингис хотын 42 цэгт камер суурилуулах ажил, Хэрлэн сумын 1-р багт аялал жуулчлалын гудамж байгуулах /Монголын эзэнт гүрний мини парк/ зэрэг нийт 1,691.5 сая төгрөгийн төсөвт өртөгтэй төсөл арга хэмжээнүүд нь  үр өгөөж муутай, ашиглалтад орсны дараа ашиглалтын зардал, засвар үйлчилгээг хэн хариуцаж ажиллах нь тодорхой бус байгааг цаашид анхаарч ажиллах шаардлагатай байна.

            ОНХС, ОНХО-ын хөрөнгөөр санхүүжүүлэх хөрөнгө оруулалт, хөтөлбөр, төсөл, арга зураг төсөвгүй, техник, эдийн засгийн үндэслэлгүй, байгаль орчны төлөв байдлын үнэлгээ хийгдээгүй  зэрэг  нийт 2,774.3 сая төгрөгийн 39 төсөл арга хэмжээг хууль зөрчин төсвийн төсөлд тусгасан байна. Үүнээс томоохон төсөвтэй хөрөнгө оруулалт, хөтөлбөр, төсөл, арга хэмжээг авч үзвэл:

  • Монголын эзэнт гүрэн Мини паркийн гадна цахилгаан, инженерийн шугам сүлжээ, тохижилт, гэрэлтүүлэг -650.0 сая төгрөг
  • Орон сууцны байруудын дээвэр, фасадын их засвар -159.5 сая төгрөг

 

 

ХЭНТИЙ АЙМАГ ДАХЬ ТӨРИЙН АУДИТЫН ГАЗАР