“Монгол Улсын 2020 оны төсвийн гүйцэтгэлийг батлах тухай” УИХ-ын тогтоолын төслийн хоёр дахь хэлэлцүүлгийг дэмжлээ

УИХ-ын Аюулгүй байдал, гадаад бодлогын байнгын хорооны өнөөдрийн хуралдаанаар Монгол Улсын 2020 оны нэгдсэн төсвийн гүйцэтгэл, Засгийн газрын санхүүгийн нэгтгэсэн тайлан, “Монгол Улсын 2020 оны төсвийн гүйцэтгэлийг батлах тухай” УИХ-ын тогтоолын төслийн хоёр дахь хэлэлцүүлгийг явуулав. Төсвийн ерөнхийлөн захирагчдын эрхлэх асуудлын хүрээний байгууллагуудын 2020 оны арванхоёрдугаар сарын 31-ний өдрөөр дуусвар болсон санхүүгийн нэгтгэсэн тайлан, төсвийн гүйцэтгэлд хийсэн аудитын дүгнэлтийг Монгол Улсын Ерөнхий аудитор Д.Занданбат хуралдаанд танилцууллаа.

Төрийн аудитын байгууллага тус Байнгын хорооны эрхлэх асуудлын хүрээнд хамаардаг хоёр байгууллагын төсвийн ерөнхийлөн захирагчдын 2020 оны санхүүгийн нэгтгэсэн тайлан, төсвийн гүйцэтгэлд аудит хийж дүгнэлт гаргасан. Аудитад Батлан хамгаалах яамны төсвийн ерөнхийлөн захирагчийн эрхлэх асуудлын хүрээний 48 байгууллагын санхүүгийн нэгтгэсэн тайланг аудитын түүвэрт хамруулж, 5.4 тэрбум төгрөгийн алдааг залруулан 28 төлбөрийн акт тогтоож, алдаа дутагдлыг дахин давтахгүй байх үүднээс 27 албан шаардлага, зөвлөмж хүргүүлсэн. Харин Гадаад харилцааны яамны төсвийн ерөнхийлөн захирагчийн эрхлэх асуудлын хүрээний 52 байгууллагын 2020 оны санхүүгийн нэгтгэсэн тайланг аудитад хамруулж, 8 байгууллагын тайланд дүгнэлт гаргасан. Аудитын явцад 8.4 тэрбум төгрөгийн алдаа, зөрчлийг арилгуулж, 2.4 тэрбум төгрөгийн алдааг залруулан 100 сая төгрөгийн төлбөрийн акт тогтоож, 10 албан шаардлага, 15 зөвлөмж хүргүүлж ажилласан талаар Монгол Улсын Ерөнхий аудитор Д.Занданбат танилцуулсан юм.

Танилцуулгатай холбогдуулан УИХ-ын гишүүн Х.Булгантуяа, Б.Баттөмөр нар Гадаад харилцааны сайдаас асуулт асууж, байр сууриа илэрхийлсэн бөгөөд тогтоолын төслийн хоёр дахь хэлэлцүүлгийг хийсэн талаарх Байнгын хорооны санал, дүгнэлтийг Төсвийн зарлагын хяналтын дэд хороонд хүргүүлэхээр тогтов.