Монгол Улсад Төрийн хяналтын байгууллага үүсэж, хөгжсөний 100 жилийн ойн арга хэмжээний хүрээнд аймаг, нийслэл дэх Төрийн аудитын газрын нийт албан хаагчдын чадавхыг бэхжүүлэх “Нэгдсэн сургалт-2022” арга хэмжээг эхлүүлэв. Аудитын чанарын хяналтын үр нөлөөг сайжруулах Төрийн аудитын байгууллагын 2022 оны зорилтын хэрэгжилтийг дэмжих хүрээнд энэхүү сургалтыг төсвийн хэмнэлтийн зарчмын дагуу цахимаар зохион байгуулан аймаг, нийслэл дэх Төрийн аудитын газрын нийт албан хаагчдыг оролцуулж байна.
Монгол Улсын Ерөнхий аудитор Д.Занданбат сургалтыг нээж хэлсэн үгэндээ “Бид улс, орныхоо хөгжлийг дэмжсэн аудитын гол хөдөлгөгч болох хүний нөөцийн хүчин зүйлсийн нэг болох аудиторуудын мэргэжлийн ур чадвар, мэргэшсэн байдалд тулгуурлан олон нийтэд хүлээн зөвшөөрөгдсөн үнэ цэнтэй аудитыг гүйцэтгэхэд чадавх бэхжүүлэх асуудалд онцгой анхаарч, төрийн аудитын хөгжлийн бодлого, төлөвлөлтийн баримт бичгүүдэд тусгасан зорилтыг хэрэгжүүлэхэд ихээхэн дэмжлэг болно гэдэгт найдаж байгаагаа илэрхийлэв. Монгол Улсын Үндсэн хуулийн нэмэлт, өөрчлөлт, Төрийн аудитын тухай хуулийн шинэчилсэн найруулга нь Төрийн аудитын байгууллагын өмнө “их хүлээлт” ирснийг мэдэрч, үүнтэй эн зэрэгцэн улс орны өнөөгийн төлөв, эдийн засгийн нөхцөл байдал, мөн олон улсын геополитик, эдийн засагт урьдчилан тооцоолох боломжгүй хүндрэл үүссэнтэй холбогдуулан нийгмийн хөгжлийн “шинэ сэргэлт”-ийг дэмжихэд төрийн аудитын байгууллагын албан хаагчдын чадавхыг бэхжүүлэх нэгдсэн сургалт онцгой ач холбогдолтой” хэмээн онцоллоо.
Үргэлжлүүлэн ҮАГ-ын Хөгжлийн бодлого, төлөвлөлтийн газрын захирал, тэргүүлэх аудитор Б.Бундхорол ТАБ-ын бодлого, нэгдсэн удирдамжаар гүйцэтгэх аудитын талаар мэдээлэл өгсөн юм. Тэрбээр “Төрийн аудитын байгууллага аудитын сэдэв сонголтыг хийхдээ иргэд, олон нийтийн анхааралд байгаа үнэн зөв хариу хүссэн, нийтийн ашиг сонирхлыг хөндсөн эрсдэлтэй асуудалд урьдчилсан тооцоо судалгаа, дүн шинжилгээ хийж, хүний нөөцийн чадавхыг дээшлүүлэхэд онцгой анхаарал тавьж байна. Хүний нөөцийн чадавхыг тогтмол сайжруулах, мэдлэг, ур чадварыг дээшлүүлэх нь аудитын сэдэв сонголт, цаашлаад аудитын чанарт ахиц дэвшил гаргах боломж бүрдэнэ” гэдгийг тодотгов.
Нэгдсэн сургалтаар шинээр батлагдсан аудитын заавар, аргачлалуудыг аудитын практик үйл ажиллагаанд хэрхэн ашиглах арга хандлагыг тайлбарлан таниулахаас гадна нэгдсэн удирдамжтай буюу нэгтгэн тайлагнах аудитын хүрээнд мэргэжлийн байгууллагуудыг хэлэлцүүлэгт урьж оролцуулах байдлаар сургалтыг зохион байгуулахаар төлөвлөсөн байна.
