Аудитын Дээд байгууллагуудын олон улсын байгууллага нь улс үндэстнүүдийн аудитын дээд байгууллагуудын хамтын ажиллагааг дэмжих, дэлхийн хэмжээнд төрийн аудитын үйл ажиллагааг тогтолцооны түвшинд сайжруулах зорилгоор 1953 онд байгуулагдсан. Нэгдсэн үндэстний байгууллага болон түүний төрөлжсөн байгууллагуудад гишүүнчлэлтэй 196 орны Аудитын Дээд байгууллагуудыг эгнээндээ нэгтгэсэн хараат бус, улс төрөөс ангид мэргэжлийн байгууллага юм. Энэхүү байгууллагын их хурал (ИНКОСАИ) нь сүүлд 2022 онд Бүгд Найрамдах Бразил улсын Рио-де-Жанейро хотод зохион байгуулагдсан.
Риогийн тунхаглалын гол агуулга нь харилцагч талуудтай ЖИГД ХАМТРАН АЖИЛЛАХ, ТЭДЭНД ҮР НӨЛӨӨТЭЙ, ҮР ДҮНТЭЙ мэдээллийг хүргэхэд төрийн аудитын байгууллага манлайлах чиг үүрэгтэй байх ёстой бөгөөд түүнийгээ байгууллагын алсын хараа, үзэл баримтлалын нэг болгосноор төрийн аудитын үр дүн, үр нөлөөг иргэд хүртсэн байхад чиглэх, ингэснээр харилцагч талуудтай харилцах харилцаанд томоохон ахиц дэвшил гаргах боломжтой болно гэж харж байгаа юм.
Монгол Улсын Ерөнхий аудиторын 2023 оны А/172 дугаар тушаалаар Төрийн аудитын байгууллагын 2024 оны зорилтыг “Аудитын шийдвэрийн хэрэгжилтэд харилцагч талуудын оролцоог сайжруулах” жил болгон зарласан.
Төрийн аудитын байгууллагын 2024 оны гүйцэтгэлийн төлөвлөгөөнд тунхаглалын зарчим болох Аудитын Дээд байгууллагын үйл ажиллагааны үр нөлөө, хүртээмжийг бэхжүүлэхэд дотоод бүх салбар нэгжүүдийн уялдаа холбоог сайжруулах болон гадаад түншүүд, харилцагч талуудыг татан оролцуулах, тогтоосон хамтын ажиллагааг үргэлжлүүлэн дэмжих чиглэлийг баримталсан арга хэмжээнүүдийг тусган хэрэгжүүлж байна.
