Аудитын дээд байгууллагын олон улсын байгууллага (АДБОУБ)-ын 2021 оны даргалагч орон болох ОХУ-ын Тооцооны танхимаас санаачлан Олон улсын эрдэм шинжилгээ, онол практикийн анхны цахим бага хурлыг 04 дүгээр сарын 21-22-ны өдрүүдэд АДБОУБ /INTOSAI/-ын ивээл дор зохион байгууллаа. Энэхүү цахим бага хурал нь Москвагийн тунхаглал гарснаас хойш аудитын үйл ажиллагаанд тулгарч буй хүндрэл бэрхшээлтэй асуудалд үр дүнтэй шийдэл олох зорилгоор АДБОУБ-ын гишүүн орнууд, бизнесийн болон иргэний нийгмийн байгууллагуудад зориулсан анхны эрдэм шинжилгээний бага хурал хэлэлцүүлэг юм.
Цахим бага хурлаар “Онцгой байдлын ба дараах үеийн төрийн байгууллагын аудит, засаглалын үйл ажиллагааны хувьсал”, “Цахим боловсрол түр зуурын шийдэл үү? Шинэ шийдэл үү?” сэдвийн хүрээнд зохиогдож дараах дэд сэдвүүдээр хэлэлцүүлгүүд өрнүүллээ. Үүнд:
- Эрүүл мэндийн болон нийгмийн тусламж үйлчилгээний аудит: ИНТОСАИ-ийн гишүүн байгууллагын шинэ хандлага, арга хэрэгсэл
- Төрийн худалдан авах ажиллагаа ба аудитын инноваци: Хуучин арга хандлагын шинэ шийдэл
- Хүртээмжтэй байдал: Аудитын зорилго ба аудитын шалгуур
- АДБ-ын үйл ажиллагаанд өгөгдөл, мэдээллийн дүн шинжилгээг ашиглах
- Стратегийн аудит
- АДБ-ын ил тод, нээлттэй байдал
- Тогтвортой хөгжлийн зорилгын хэрэгжилт зэрэг асуудлуудыг хэлэлцсэн байна.
Энэхүү Олон улсын эрдэм шинжилгээ, онол практикийн анхны цахим бага хуралд ҮАГ-ыг төлөөлж Хөгжлийн бодлого, төлөвлөлтийн газрын судалгаа, шинжилгээ хариуцсан ахлах шинжээч Ж.Ганчимэг оролцож, Эрүүл мэндийн болон нийгмийн тусламж үйлчилгээний аудит: ИНТОСАИ-ийн гишүүн байгууллагын шинэ хандлага, арга хэрэгсэл зүүм бүлгийн хурал, хэлэлцүүлэгт “Эрүүл мэндийн салбарын аудит” сэдвээр илтгэл тавилаа.
Тус илтгэлдээ Эрүүл мэндийн салбарт ТАБ-аас хийсэн холбогдох аудитын дүн, дүгнэлт, цар тахлын үеийн эрүүл мэндийн нөхцөл байдал, “Нэг хаалга-нэг шинжилгээ” бодит цагийн аудит болон эрүүл мэндийн салбарт хэрэгжиж байгаа цахим шилжилт, инновацийн төсөл хөтөлбөрийг хэрхэн аудитлах талаар туршлагаа хуваалцаж, дэлгэрэнгүй танилцуулга хийлээ.
Хоёр дахь өдрийн хуралд Монгол Улсын ҮАГ-ын төлөөлөл Тогтвортой хөгжлийн зорилгын хэрэгжилт зүүм бүлгийн хурал, хэлэлцүүлэгт оролцсон байна. Энэхүү Олон улсын эрдэм шинжилгээ, онол практикийн анхны цахим хурал нь цар тахлын үед ИНТОСАЙ-н гишүүн орнуудтай туршлага солилцох, ҮАГ-ын сайн туршлагыг түгээн дэлгэрүүлэх үр дүнтэй арга хэмжээ боллоо.
