Сүүлийн жилүүдэд иргэд, олон нийтийн анхаарлын төвд хүнсний ауюулгүй байдлын асуудал яригдсаар байна. Тэгвэл өнөөдөр буюу тавдугаар сарын 6-ны өдөр Үндэсний аудитын газраас “Хүнсний аюулгүй байдлыг хянах өнөөгийн тогтолцоо, төсвөөс зарцуулсан хөрөнгийн үр дүн”-д гүйцэтгэлийн аудит хийхээр төлөвлөн урьдчилсан судалгааны шатанд мэргэжлийн холбоод, судлаачдын саналыг сонсох, цахим хэлэлцүүлгийг зохион байгууллаа. Энэхүү цахим уулзалтыг Европын холбооны итгэлцлийн сангийн санхүүжилтээр Дэлхийн банкны хэрэгжүүлж буй Монгол улсад засаглалыг бэхжүүлэх төлийн хүрээнд зохион байгуулсан юм.
Аудитын үр дүн, чанарыг сайжруулахад иргэдийн оролцоо, мэргэжлийн холбоод, судлаачдын өгсөн санал чухал үүрэгтэй тул аудитын урьдчилсан судалгааны ажлын хүрээнд холбогдох иргэний нийгмийн байгууллага, төрийн бус байгууллагын оролцоог нэмэгдүүлэхэд Төрийн аудитын байгууллага өндөр ач холбогдол өгч бодлого, стратегидаа тусган ажиллаж байгаа.
Өнөөдрийн цахим уулзалтад Монголын хүнсчдийн холбоо, Мэргэжлийн социологчдын холбоо, Хүнсний технологи инновацийн төв, ШУТИС, Нийгмийн эрүүл мэндийн үндэсний төв, Монголын жимс жимсгэний үндэсний холбоо болон иргэдийн төлөөлөл оролцож хүнсний аюулгүй байдлын хяналт, аудитад онцлон анхаарах асуудал, төрийн бодлогод тусгах, шийдвэр гаргах түвшинд уламжлах зэрэг асуудлаар аудитын багийн гишүүдтэй мэдээлэл өгч, санал, туршлага солилцсон юм.
Цахим хэлэлцүүлгийн үеэр Монголын хүнсчдийн холбооны тэргүүн М.Нармандах “Өнөөдөр Монгол улсад хүнсний хангамж, хүнсний нөөц, хүнсний аюулгүй байдал гэсэн гурван асуудал хамгийн чухал байна. Бид үүнд анхаарч ажиллах хэрэгтэй” хэмээн онцлоод аудитын үйл ажиллагаанд хамтран ажиллах хүсэлтэй байгаагаа илэрхийлсэн юм.
“Хүнсний аюулгүй байдлыг хянах өнөөгийн тогтолцоо, төсвөөс зарцуулсан хөрөнгийн үр дүн” сэдэвт гүйцэтгэлийн аудит 2021 оны 06-р сарын 11-ны өдрөөс 12-р сарын 10-ны өдрийн хооронд үргэлжилж, дүгнэлтээ гаргаж олон нийтэд танилцуулах юм.
Алсын хараа
АЛСЫН ХАРАА Монгол Улсын хөгжлийн бодлого, зорилтуудыг хэрэгжүүлэхэд чиглэсэн эдийн…
