САНЖИЙН БАНЗРАГЧ /1947-2021/
Санжийн Банзрагч 1947 онд Говь-Алтай аймгийн Бигэр суманд Хөдөлмөрийн баатар алдарт тууварчин Санжийн гэр бүлд төрж, 1965 онд Говь-Алтай аймгийн 10-н жилийн дунд сургууль, 1970 онд ОХУ-ын Эрхүү хотын Политехникийн дээд сургууль, 1982 онд ОХУ-ын нийгмийн ухааны академийг тус тус сурч төгссөн.
1970 онд Цахилгаан эрчим хүчний барилга трестэд мастераар ажлын гараагаа эхэлж, улмаар гааль, татвар, хөдөлмөрийн салбарт газар, хэлтсийн дарга, Ардын хянан шалгах хорооны орлогч дарга, Төрийн хянан шалгах хорооны анхны Ерөнхий нарийн бичгийн дарга зэрэг төрийн өндөр албан тушаал хашсан төр нийгмийн зүтгэлтэн байлаа.
Ажиллах хугацаандаа төрийн хяналт бол төрийн удирдлагын чухал механизм гэж өөрийн жанжин шугам болгон төрийн хяналтын арга зүй, хяналтын байгууллагын бүтэц, зорилгыг боловсронгуй болгох, материаллаг баазыг бэхжүүлэх, мэргэжилтэй боловсон хүчнээр хангах, төрийн өмчийн хадгалалт хамгаалалт түүнд бүртгэлээр тавих хяналтыг дээшлүүлэх, төсвийг үр ашигтай, тогтоосон журам, зориулалтын дагуу зарцуулахад ихээхэн хувь нэмэр оруулсан төрийн хяналтын байгууллагын шилдэг удирдагчдын нэг байсан юм.
Банзрагч нь ажлын төлөө тууштай зан чанартай, ажилтнуудтайгаа мэдлэг боловсролтой, ёс суртахуунтай, нөхөрсөг харьцдаг, хяналтын ажлын үр дүнг цаг үеийн нөхцөл байдалтай уялдуулан гаргадаг шударга удирдагч байсан юм.
Мөн гэр бүлийн халамжит хань, хүүхдүүд, ач, зээгийн хайртай аав, өвөө, өрх гэрийн хүндэт тэргүүн, төрөл төрөгсдийн түшиг тулгуур болсон эрхэм байлаа. Түүний хөдөлмөр, зүтгэлийг төр засгаас өндөр үнэлж Хөдөлмөрийн гавьяаны улаан тугийн одон, Алтан гадас одон, ойн медалиуд, Төрийн хяналтын болон албаны тэргүүний ажилтан цол, тэмдгээр шагнажээ.
Талийгаачийн нөхөрсөг, үнэнч шударга, зарчимч, ажилсаг хичээнгүй, энэрэнгүй зан чанар, гэгээн дүр төрх төрийн хяналтын ажилтан бидний сэтгэл зүрхэнд үүрд орших болно.
2021.06.07
Д.Занданбат,
Г.Эрдэнэцэцэг,
Ц.Наранчимэг,
Ц.Ганболд,
А.Сүхбаатар
