Төрийн аудитын байгууллага Удирдах ажилтны зөвлөгөөнөө 2021 оны 07 дугаар сарын 09-ний өдөр цахимаар зохион байгуулав. Зөвлөгөөнд Үндэсний аудитын газрын удирдлагууд болон аймаг, нийслэл дэх Төрийн аудитын газрын тэргүүлэх аудиторууд оролцож 2021 оны эхний хагас жилийн ажлаа дүгнэж, цаашид хийх ажлынхаа талаар санал солилцлоо.
Зөвлөгөөний үеэр 2021 онд хийгдэж буй аудитын явц, үр дүн, цаашдын төлөв, Төрийн аудитын байгууллагын харилцагч талуудын хамтын ажиллагаа, иргэдийн оролцоог хангах асуудлууд болон 2022 оны аудитын сэдэв, цахим сургалтын нэгдсэн сангийн үйл ажиллагаа, үр дүн зэрэг сэдвүүдийн талаар хэлэлцэж, энэ оны эхний хагас жилийн гүйцэтгэлд хийсэн дотоод хяналт шинжилгээний үнэлгээг сонсож, амжилт ололт, алдаа дутагдлаа цэгнэн ярилцав.
Төрийн аудитын байгууллага 2020 оны үйл ажиллагааны тайлангаа УИХ-ын Төсвийн байнгын хороонд танилцуулах үеэр Үндэсний аудитын газар төв болон орон нутагт ажиллаж буй бүх албан хаагчдын чадавхыг сайжруулах “Цахим сургалтын систем”-ийг нэвтрүүлж, кредит олгодог болсон нь төрийн албан хаагчдын чадамжийг нэмэгдүүлэх сайн жишиг тогтоосон хэмээн онцолсныг зөвлөгөөнд оролцогчдод сонордууллаа.
Төрийн аудитын байгууллагын үндэс суурь 1922 оны 06 дугаар сарын 23-ны өдөр Ардын Хувьсгалт Засгийн Газрын дэргэдэх Хянан байцаах хэлтэс нэртэйгээр байгуулагдаж байсан бөгөөд 2022 онд болох Төрийн хяналтын байгууллагын түүхт 100 жилийн ойн арга хэмжээ энэ удаагийн зөвлөгөөний онцлох сэдвүүдийн нэг нь байв.
Төрийн хяналтын байгууллагын түүхт 100 жилийн ойн арга хэмжээтэй холбогдуулан Монгол Улсын Ерөнхий аудитор Д.Занданбат “Төрийн аудитын байгууллагын үе үеийн удирдлагууд, албан хаагчид, ахмад настан, залуучууд та бүхэн аудитын үйл ажиллагааг олон нийтэд зөв таниулах, эх орон, нийгэм, гэр бүл, хамт олондоо хөгжлийн ирээдүйг цогцлооход төрийн тусгай үүргийг хэрэгжүүлж буй нэр хүндтэй үүргээ мэргэжлийн ёс зүйтэй, хариуцлагатай гүйцэтгэж, зөв үйлдэл, зөв үлгэр дуурайлалаар нийгэм олон түмнээ соён гэгээрүүлэх, залуу үеэ сурган дадлагажуулж, манлайлан ажиллах”-ыг уриаллаа.
Монгол Улсын Ерөнхий аудитор Д.Занданбат “Аудитыг уламжлалт буюу хяналт шалгалтын арга барилаар гүйцэтгэх нь өнөөгийн нийгмийн онцлог, олон улсын аудитын чиг хандлага, зарчимд тохирохгүй байна” хэмээн онцлоод цаашид харилцагч талууд, нийгмийн сэтгэл зүйг мэдэрч, шалгагдагч байгууллагын мэдээллийг нягтлан боловсруулж, алдаа дутагдал гаргахаас урьдчилан сэргийлэх, алдааг залруулахад зөвлөн туслах замаар аудитын чанарыг сайжруулж, хөгжлийн шинэ шатанд гаргаж ажиллах чиглэлийг өгч зөвлөгөөнөө өндөрлөлөө.
Дархан-Уул аймаг дахь Төрийн аудитын газар “Төрөөс бүх нийтийн боловсрол олгож байгаа өнөөгийн байдал, үр дүн”-д хийсэн гүйцэтгэлийн аудит
Дархан-Уул аймаг дахь Төрийн аудитын газар “Төрөөс бүх нийтийн боловсрол…
