Үндэсний Аудитын Газар болон НҮБ-ын хөгжлийн хөтөлбөрийн хамтын ажиллагааны хүрээнд “Тогтвортой хөгжлийн зорилготой уялдсан бодлогын хэрэгжилт болон үр дүнд суурилсан төсвийн аудитын практикийг бэхжүүлэх нь” сэдэвт хэлэлцүүлгийг өнөөдөр зохион байгууллаа.
Үндэсний Аудитын Газар нь Монгол Улсын төсөв, санхүүгийн хяналтыг хэрэгжүүлэх, ил тод байдлыг нэмэгдүүлэх, Дэлхийн Тогтвортой Хөгжлийн Зорилгын үндэсний хэрэгжилтийг хянах гол байгууллага тул НҮБ-ын Хөгжлийн хөтөлбөрийн хэрэгжүүлж буй Европын Холбооны санхүүжилттэй “ТХЗ-той уялдсан төсвийн төлөвлөлтөөр хөдөлмөр эрхлэлтийн шинэчлэлийг дэмжих нь” төсөл болон НҮБ-ын ТХЗ хамтарсан сангийн санхүүжилттэй “Монгол Улсад тогтвортой хөгжлийн санхүүжилтийн нэгдсэн тогтолцоог бэхжүүлэх нь” төсөлтэй хамтран ажиллаж байна.
Тус хэлэлцүүлэгт НҮБХХ суурин төлөөлөгчийн орлогч Нашида Саттар, Монгол Улсын Ерөнхий Аудиторын Орлогч Г.Эрдэнэцэцэг, Гүйцэтгэлийн аудитын олон улсын зөвлөх Др.Алмагул болон “Монгол Улсад ТХЗ-той уялдсан төсвийн төлөвлөлтөөр хөдөлмөр эрхлэлтийн шинэчлэлийг дэмжих нь” төсөл, Монгол Улсад тогтвортой хөгжлийн санхүүжилтийн нэгдсэн тогтолцоог бэхжүүлэх нь” төслийн менежерүүд, Төрийн аудитын байгууллагын албан хаагчид, зэрэг 100 гаруй хүн танхимаар аймаг, нийслэл дэх Төрийн аудитын газрын 200 гаруй албан хаагчид цахим хэлбэрээр оролцлоо.
Монгол Улсын Ерөнхий аудиторын орлогч Г.Эрдэнэцэцэг хэлэлцүүлгийг нээж үг хэлэхдээ Төрийн аудитын байгууллагын 2019-2024 оны стратегийн төлөвлөгөө, 2018-2022 оны сургалт, хөгжлийн стратегийн төлөвлөгөө, Харилцагч талуудын оролцооны 2019-2023 оны стратеги төлөвлөгөөний дагуу энэхүү арга хэмжээг зохион байгуулж буйг дурдаад хамтран ажиллаж байгаа байгууллагуудад талархал илэрхийллээ.
Хэлэлцүүлгийн үеэр МУИС-ийн багш, Др.профессор Н.Батнасан “Хөгжлийн бодлого төлөвлөлт- Тогтвортой Хөгжлийн Зорилго”-ын талаар танилцуулсан бол дээр дурдсан төслийн менежерүүд 2021 онд хийж, хэрэгжүүлсэн ажлын үр дүн, 2022 оны төлөвлөгөөгөө танилцуулан харилцан санал солилцов.
НҮБ-ын Ерөнхий Ассемблейн 70 дугаар чуулганаар 2030 он хүртэлх Тогтвортой хөгжлийн зорилго”-ыг 193 гишүүн орны дэмжлэгтэйгээр батлан, хэрэгжүүлж эхлээд байгаа. Монгол Улсын Их хурал ТХЗ-той уялдуулан “Монгол Улсын тогтвортой хөгжлийн үзэл баримтлал-2030”-ыг 2016 онд баталж, улмаар Ерөнхий сайдын захирамжаар шалгуур үзүүлэлтүүдийг урьдчилсан байдлаар тодорхойлон ажиллаж байгаа юм.
