Шинжээчээр хамтран ажиллах урилга
Үндэсний аудитын газар нь “Монгол Улсын 2021 оны нэгдсэн төсвийн гүйцэтгэлд дүгнэлт гаргах”-д шинжээч сонгон шалгаруулж, гэрээ байгуулан хамтран ажиллахаар төлөвлөж байгаа тул зөвлөхийн үйлчилгээ үзүүлэх хүсэлтэй хувь хүн/баг/, хуулийн этгээдийг санал ирүүлэхийг урьж байна.
Шинжээч нь ҮАГ-АД/22-022 дугаар ажлын даалгаврын дагуу дараах чиглэлүүдээр судалгаа, шинжилгээ хийх, дүгнэлт зөвлөмж боловсруулах, аудитад туслах, арга зүйн зөвлөгөө өгөх ажлыг гүйцэтгэнэ. Үүнд:
2.1 Монгол Улсын төсөв, мөнгөний бодлого уялдаж байгаа эсэхэд дүн шинжилгээ хийх;
2.2 Монгол Улсын 2021 оны төсвийн төлөвлөлт, гүйцэтгэлд баримталсан бодлого, чиглэл нь төсвийн тогтвортой байдал, “Алсын хараа 2050”, Монгол Улсыг хөгжүүлэх 2021-2025 оны төлөвлөгөө, Засгийн газрын 2020-2024 оны үйл ажиллагааны хөтөлбөртэй уялдсан эсэхэд дүн шинжилгээ хийх;
2.3 Засгийн газрын 2021 оны “Эрүүл мэндээ хамгаалж, эдийн засгаа сэргээх 10.0 (арван) их наядын цогц төлөвлөгөө” батлах тухай 42 дугаар тогтоолын хэрэгжилтэд дүн шинжилгээ хийж, дүгнэлт зөвлөмж өгөх;
2.4 Эрүүл мэндийн салбарын шинэчлэл, гүйцэтгэлд суурилсан төсвийн гүйцэтгэлийн үр дүнг судалж, дүгнэх;
2.5 Засгийн газрын гадаад зээлийн хөрөнгөөр хэрэгжиж байгаа төсөл, арга хэмжээний хөрөнгийн зарцуулалтад дүн шинжилгээ хийж, дүгнэлт, зөвлөмж өгөх;
2.6 Монгол Улсын 2021 оны нэгдсэн төсвийн төлөвлөлт, гүйцэтгэлд судалгаа, дүн шинжилгээ хийх;
2.7 Ковид-19 цар тахлын үед хэрэгжсэн төсвийн зарцуулалтын талаар дүн шинжилгээ хийх;
2.8 Засгийн газрын өрийн тайлан, гадаад валютын нөөцийн тогтвортой байдлыг хангах чиглэлээр хэрэгжүүлсэн арга хэмжээнд дүн шинжилгээ хийх, дүгнэлт өгөх;
2.9 Өмнөх оны нэгдсэн төсвийн гүйцэтгэлийн аудитаар өгсөн зөвлөмжийн хэрэгжилтийг үнэлэх;
2.10 Төсвийн тогтвортой байдлын тухай хуулийн 11.1.4 “төсвийн гүйцэтгэл нь дунд хугацааны төсвийн хүрээний мэдэгдлийг хэрхэн хангасан байдалд дүн шинжилгээ хийх”; 14.1 “Засгийн газар төсвийн тусгай шаардлагыг хэрхэн хангасан тухай дүгнэлт, тайланг бэлтгэн төсвийн гүйцэтгэлийн тайланд тусгаж, Улсын Их Хуралд тайлагнана.”, 14.2 “Энэ хуулийн 14.1-д заасан төсвийн гүйцэтгэлийн тайланд төрийн аудитын төв байгууллага аудит хийхдээ төсвийн тусгай шаардлагыг хэрхэн хэрэгжүүлсэн байдалд дүгнэлт гаргана” гэж заасны дагуу дүгнэлт, зөвлөмж гаргах;
2.11 Аудитын дүнд үндэслэн санал, дүгнэлт, зөвлөмжийн төсөл боловсруулах, аудитын багт арга зүйн зөвлөгөө өгөх зэрэг болно.
Шинжээч нь Монгол Улсын 2021 оны нэгдсэн төсвийн гүйцэтгэлд аудитыг гүйцэтгэх Аудитын хоёрдугаар газрын аудитын багийн бүрэлдэхүүнд ажиллаж, холбогдох аудитыг 2022 оны 06 дугаар сарын 17-ны өдрийг дуустал хугацаанд гүйцэтгэх ба Монгол Улсын 2021 оны нэгдсэн төсвийн гүйцэтгэл, Улсын төсвийн, Орон нутгийн, Эрүүл мэндийн даатгалын болон Нийгмийн даатгалын сангийн төсвийн гүйцэтгэлийн тайлан, холбогдох бусад баримт материалыг хамруулна.
Ажлын даалгаварт тусгасан ажлыг чанарын өндөр түвшинд гүйцэтгэж, үр дүнг тусгасан шинжээчийн тайланг бэлтгэн, аудитын багт хүлээлгэн өгнө.
Санал ирүүлж буй шинжээч нь дээрх зөвлөх үйлчилгээг гүйцэтгэхээ илэрхийлсэн албан хүсэлт, санхүүгийн дэлгэрэнгүй санал, урилгын хавсралт маягтаар нэмэлт мэдээлэл ирүүлэхээс гадна дараах мэдээллийг хавсарган ирүүлнэ. Үүнд:
Хуулийн этгээд бол:
– Улсын бүртгэлийн гэрчилгээний хуулбар;
– Татварын өргүй тухай тодорхойлолт;
– Нийгмийн даатгалын шимтгэлийн өргүй тодорхойлолт;
– Шүүхийн төрөлжсөн архивын тодорхойлолт;
– Гүйцэтгэсэн ижил төстэй ажлын мэдээлэл сүүлийн 3 жилээр /2019, 2020, 2021 он/;
– Ажилтны анкет, боловсрол, мэргэшлийн гэрчилгээний хуулбар;
– Ажилтны нийгмийн даатгалын цахим лавлагаа /сүүлийн 1 жилээр/;
– Сүүлийн 2 жилийн санхүүгийн тайлан, аудитын дүгнэлтийн хамт /2020, 2021 он/.
Хувь хүн/баг бол:
– Иргэний үнэмлэхийн хуулбар;
– Анкет /СV/;
– Боловсрол, мэргэшлийн гэрчилгээний хуулбар;
– Гүйцэтгэсэн ижил төстэй зөвлөх үйлчилгээний мэдээлэл /сүүлийн 3 жилээр/;
– Багийн хувьд гишүүдийн хамтран ажиллах гэрээ /нотариатаар баталгаажуулах/
Шинжээчид тавигдах шаардлага:
- Төсвийн төсөл, төсвийн гүйцэтгэлээр макро түвшний судалгаа, дүн шинжилгээ хийж байсан ажлын туршлагатай;
- Санхүү, эдийн засгийн мэргэжилтэй;
- Санхүү, эдийн засгийн чиглэлээр эрдмийн зэрэг, цолтой;
- Мэргэжлийн гадаад хэлний мэдлэгтэй.
Шинжээч нь аудитын явцад олж авсан болон мэдсэн төр, байгууллага, хувь хүний нууцад хамаарах мэдээллийн нууцлалыг хадгалах ба гэрээгээр тохиролцсон ажилд оролцож дүгнэлт гаргах үйлчилгээ үзүүлэхдээ мэргэжлийн болон ёс зүйн өндөр түвшинд шударгаар ажиллаж, төрийн аудитын байгууллагын албан хаагчийн мөрдөх ёс зүйн дүрмийг нэгэн адил даган мөрдөж ажиллана.
Сонирхсон этгээд нь холбогдох мэдээллийг 2022 оны 05 дугаар сарын 26-ны өдрийн 09 цаг 50 минутаас өмнө авч болох бөгөөд мэдээллээ 2022 оны 05 дугаар сарын 26-ны өдрийн 10 цаг 00 минутын дотор дараах цахим хаягаар /tsend-ayushn@audit.gov.mn, info@audit.gov.mn/ pdf файл хэлбэрээр ирүүлнэ үү.
Хариуцсан ажилтан: Үндэсний аудитын газрын Санхүү, хөрөнгө оруулалтын хэлтсийн Худалдан авах үйл ажиллагаа хариуцсан шинжээч Н.Цэнд-Аюуш. Гар утас: 88051068
Захиалагчийн хаяг: 15160 Улаанбаатар хот, Чингэлтэй дүүрэг, Бага тойруу-3, Засгийн газрын IV байр, 409 тоот өрөө. Үндэсний Аудитын газар, Утас: 26 35 33
Ажлын даалгавар болон холбогдох маягтыг үзнэ үү
