Төрийн албаны зөвлөл, НҮБ-ын Хөгжлийн хөтөлбөрийн хэрэгжүүлж буй “Монгол Улсад мэргэжлийн, иргэн төвтэй төрийн албыг төлөвшүүлэх нь” төслийн шугамаар Эмэгтэйчүүд, залуучуудын оюуны сан төрийн бус байгууллагатай хамтран “Төрийн албан хаагч эмэгтэйчүүдийн манлайллын хөтөлбөр”-ийг хэрэгжүүлдэг.
2022 оны “Төрийн албан хаагч эмэгтэйчүүдийн манлайллын хөтөлбөр”-ийн ментороор Төрийн албаны зөвлөлийн гишүүн Ц.Амартөгс, Ерөнхий сайдын ахлах зөвлөх бөгөөд ажлын албаны дарга А.Ариунзаяа, Үндэсний аудитын газрын Хөгжлийн бодлого, төлөвлөлтийн газрын захирал, тэргүүлэх аудитор Б.Бундхорол, УИХ-ын даргын зөвлөх О.Номинчимэг, Сэлэнгэ аймгийн Засаг даргын Тамгын газрын дарга Ө.Сувдаа нар сонгогдон ажиллав.
“Төрийн албан хаагч эмэгтэйчүүдийн манлайллын хөтөлбөр”-ийн ментор Үндэсний аудитын газрын Хөгжлийн бодлого, төлөвлөлтийн газрын захирал, тэргүүлэх аудитор Б.Бундхорол оролцогчдод Үндэсний аудитын газрын сургалтын платформын сайн туршлага, түүний хүний нөөцийн бодлого, байгууллагын хөгжлийн асуудалд ашиглах ач холбогдлын талаар танилцуулж, төрийн болон төрийн бус байгууллагын хамтын ажиллагааны талаар ажлын туршлагаа солилцсон уулзалтууд 3 сарын турш үргэлжлээд өндөрлөж байна.
“Төрийн албан хаагч эмэгтэйчүүдийн манлайллын хөтөлбөр”-ын энэ жилийн элсэлтийн 85 оролцогчийн сертификат гардуулах ёслол 2022.12.02-ны өдөр болж, албаны хүмүүс, менторууд оролцож, төрийн албан хаагч эмэгтэйчүүдийн ажилд амжилт хүслээ.
