Үндэсний аудитын газраас “Монгол Улсын Хөгжлийн 2022 оны жилийн төлөвлөгөөний гүйцэтгэл, үр дүн” болон “Улс, орон нутгийн төсвийн 2022 оны хөрөнгө оруулалтын төлөвлөгөөний хэрэгжилт, үр дүн”-д хийх гүйцэтгэлийн аудитын нээлтийг 2023.01.05-ны өдөр хийлээ.
Нээлтийн арга хэмжээг Үндэсний аудитын газрын Гүйцэтгэл-нийцлийн аудитын газрын захирал, тэргүүлэх аудитор Д.Энхболд нээж, аудитын төлөвлөгөө болон цаашид анхаарах шаардлагатай асуудлуудыг танилцууллаа. Аудитын нээлтэд Монгол Улсын Ерөнхийлөгчийн Тамгын газар, УИХ-ын Тамгын газар, Монгол Улсын Ерөнхий сайдын ажлын алба, яамд, зарим агентлагийн холбогдох албан тушаалтнууд оролцож, аудитын төлөвлөгөөг хүлээн авав. Аудитын багын зүгээс төлөвлөгөөнд тусгасан зарим мэдээллийг танилцуулж, өмнөх онд гүйцэтгэсэн аудитаар өгсөн зөвлөмж, акт, албан шаардлагын хэрэгжилтийг гаргаж, аудитад шаардлагатай баримт бичгийг дурдсан хугацаанд гаргаж өгөхөд анхаарч, хамтран ажиллахыг хүслээ.
“Монгол Улсын Хөгжлийн 2022 оны жилийн төлөвлөгөөний гүйцэтгэл, үр дүн” сэдэвт аудитаар Монгол Улсын хөгжлийн 2022 оны төлөвлөгөөг үндэслэлтэй төлөвлөж батлуулсан эсэх, гүйцэтгэл зорилго, үр дүндээ хүрсэн эсэх, хэрэгжилтийг бодитой үнэлж, тайлагнан, мэдээллийн нэгдсэн санг бүрдүүлсэн эсэхэд аудит хийж, дүгнэлт зөвлөмж боловсруулж холбогдох байгууллага, албан тушаалтан, Монгол Улсын Их хуралд танилцуулах юм.
“Улс, орон нутгийн төсвийн 2022 оны хөрөнгө оруулалтын төлөвлөгөөний хэрэгжилт, үр дүн” сэдэвт аудитаар хөрөнгө оруулалтын төсөл, арга хэмжээг хууль, хөгжлийн бодлогын баримт бичигтэй нийцүүлэн төлөвлөсөн эсэх, хөрөнгө оруулалтын төлөвлөгөөг хэрэгжүүлэх үйл ажиллагаа хуульд нийцсэн эсэх, орон нутгийн төсвийн хөрөнгө оруулалт үр дүнтэй хэрэгжсэн эсэхэд аудит хийхээр төлөвлөгөөнд тусгасан. Уг аудитыг улсын хэмжээнд нэгдсэн удирдамжаар хийж гүйцэтгэхээр төлөвлөөд байна.
