Орхон аймаг дахь Төрийн аудитын газраас Орхон аймгийн боловсролын салбарын байгууллагуудын 2022 оны санхүүгийн тайланд хийсэн аудитаар илэрсэн алдаа, зөрчилтэй асуудлын талаар боловсролын салбарын нягтлан бодогч нарт сургалт зохион байгууллаа.

Төсвийн тухай хуулийн 8-р зүйл, Төрийн аудитын тухай хуулийн 6.3.1, 8 дугаар зүйлийн 8.1-д заасны дагуу боловсролын салбарын нийт 51 байгууллагын 2022 оны жилийн эцсийн санхүүгийн тайланд аудит хийсэн.

Боловсролын салбарын нийт нягтлан бодогчдод Орхон аймаг дахь Төрийн аудитын газраас тайлант оны санхүүгийн тайлангийн аудитаар илэрсэн алдаа, зөрчилтэй асуудлыг танилцуулж, аудитаар тогтоосон төлбөрийн акт, өгсөн албан шаардлага, зөвлөмжийг цаг хугацаанд нь хэрэгжүүлж ажиллаж, цаашид хэрхэн давтан гаргахгүй байх талаар сургалт зохион байгууллаа.

Үүнд: БШУГ – 1, Сургууль – 17, Цэцэрлэг – 30 Мэргэжлийн сургалт, үйлдвэрлэлийн төв – 2, Насан туршийн боловсролын төв – 1 байна. Эдгээрээс 7 төсвийн шууд захирагчийн санхүүгийн тайланг түүвэрт хамруулж, 44-н байгууллагын санхүүгийн тайланд аудит хийж, дүгнэлт гаргасны 21 байгууллагын аудитыг хараат бус аудитын компаниар гэрээгээр гүйцэтгүүлсэн.

Аудитыг УСНББОУС, FAS.AUDIT.MN систем, Сангийн сайдын тушаалаар батлагдсан заавар, журмууд, МУЕА-н 2022 оны А/66 дугаар тушаалаар баталсан АДБОУС 200 “Санхүүгийн аудитын зарчим”, АДБОУС 2000 “Санхүүгийн аудитын стандартын хэрэглээ” стандартуудын хүрээнд гүйцэтгэсэн.

Бие дааж дүгнэлт гаргасан байгууллагуудаас 43 байгууллагад “Өөрчлөлтгүй” дүгнэлт, 1 байгууллагад “Хязгаарлалттай” дүгнэлт өгсөн байна.

Аудитаар нийт 1,127,466.4 мянган төгрөгийн алдаа, зөрчил илрүүлж, санхүүгийн тайлангийн алдаатай илэрхийлэлтэй холбоотой 404,807.2 мянган төгрөгийн 32 алдааг аудитын явцад залруулж, 17,088.8 мянган төгрөгийн 55 төлбөрийн акт тогтоож, 508,599.4 мянган төгрөгийн 43 албан шаардлага, 196,970.9 мянган төгрөгийн 93 зөвлөмж хүргүүллээ.

Үүнээс нийцлийн аудитын асуудал буюу Шилэн дансны хуулийн хэрэгжилттэй холбоотой, хуулийн хэрэгжилтийг хангаж ажиллах талаар 6 байгууллагад зөвлөмж, өмнөх оны аудитаар өгсөн зөвлөмжийг бүрэн хэрэгжүүлж ажиллаагүй 6 байгууллагад албан шаардлага өгсөн байна.

Төрийн аудитын байгууллагаас Төрийн хэмнэлтийн хутай хуулийн хэрэгжилтэд хяналт тавих, бодлого, чиглэлийг баталсан бөгөөд энэхүү чиглэлийн хүрээнд цахим хэрэглээний зардлыг хэтрүүлэн зарцуулж Төрийн хэмнэлтийн тухай хуулийн 12.1.1 дэх заалтыг хэрэгжүүлж ажиллаагүй нийт 9 сургууль, 21 цэцэрлэгт 8,548.0 мянган төгрөгийн төлбөрийн акт тогтоосон байна.

Сургалтын төсгөлд нягтлан бодогчдоос ирүүлсэн асуултад хариулт өгч, санал солилцлоо.