Төрийн аудитын байгууллагын бодлогоор “Байгалийн нөөц ашигласны төлбөрийн тухай хуулийн хэрэгжилт” сэдвээр нийцлийн аудит хийж, дүгнэлт, зөвлөмж боловсруулж, дүнг холбогдох байгууллагад танилцуулахаар аудитын нээлт хийлээ.
Улсын хэмжээнд нэгдсэн удирдамжаар хийх тус аудитын нээлтэд Монгол Улсын Ерөнхий аудиторын орлогчийн албан үүргийг түр орлон гүйцэтгэгч Ц.Наранчимэг, Үндэсний аудитын газрын Гүйцэтгэл-нийцлийн аудитын газрын захирал Д.Энхболд, Говь-Алтай аймаг дахь Төрийн аудитын газрын дарга Х.Түвшинбаяр, Үндэсний аудитын газрын Аудитын нэгдсэн удирдлага, зохицуулалтын газрын Аудитын удирдлагын менежер Ц.Бат-Өлзий нар болон аудитын баг танхимаар, аймаг, нийслэл дэх Төрийн аудитын газрууд цахимаар тус тус оролцлоо. Мөн Байгаль орчин, аялал жуулчлалын яам, Татварын ерөнхий газрын албаны хүмүүс аудитын нээлтэд хүрэлцэн ирж оролцон “Байгалийн нөөц ашигласны төлбөрийн тухай хуулийн хэрэгжилт” аудитын төлөвлөгөөг хүлээн авав.
Тус аудитаар Байгалийн нөөц ашигласны төлбөрийн тухай хуулийг хэрэгжүүлэх эрх зүйн орчин, төрөөс баримтлах бодлогын баримт бичгийн хэрэгжилт хангагдсан эсэх, байгаль орчныг хамгаалах, нөхөн сэргээх арга хэмжээнд зарцуулах төлбөрийн орлогын хэсгийн бүрдүүлэлт, зарцуулалт хууль, журмын дагуу хэрэгжсэн эсэхийг 2021-2023 оныг хамруулан үзэхээр төлөвлөөд байна.
Үндэсний аудитын газраас энэхүү аудитыг нэгдсэн удирдлагаар ханган ажиллах бол Говь-Алтай аймаг дахь Төрийн аудитын газар аудитын тайланг нэгтгэх ажлыг гүйцэтгэж байгаа нь онцлогтой юм.
