Төрийн аудитын байгууллага Улсын Их хуралтай харилцах механизмыг улам боловсронгуй болгох, хамтын ажиллагааг илүү үр дүнтэй байлгахад анхаарч үе шаттай ажлууд зохион байгуулж байгаа билээ. Энэ ажлын хүрээнд УИХ-ын Тамгын газрын Хяналт шалгалт, үнэлгээний газрын албан хаагчдад зориулсан “Төрийн аудитын байгууллага, төрийн аудитын үйл ажиллагааны талаарх үндсэн ойлголт” сэдэвт багц сургалтыг амжилттай зохион байгууллаа.
Сургалтын үйл ажиллагааг нээж, УИХ-ын Тамгын газрын Хяналт шалгалт, үнэлгээний газрын дарга Ц.Батбаатар “УИХ хянаж шалгах бүрэн эрхээ хэрэгжүүлэхдээ Төрийн аудитын байгууллага болон бусад хяналт шалгалтын чиг үүрэг бүхий байгууллагыг түшиглэн явуулна гэж хуульд заасан. Төрийн аудитын байгууллагаас гаргаж байгаа аудитын дүгнэлт, зөвлөмжийг хэрэгжүүлэхэд анхаарал хандуулж ажиллах нь парламентын хяналтын үр дүнтэй хэлбэр гэж үздэг. Тиймээс төрийн аудитын үйл ажиллагаа, сэдэв сонголт , санхүү болон гүйцэтгэлийн аудитыг хэрхэн хийдэг зэрэг тогтолцооны талаарх ойлголт, мэдээлэлтэй болох хүсэлт тавьсныг Төрийн аудитын байгууллага хүлээн авч энэхүү сургалтыг зохион байгуулж байгаад талархал илэрхийлж байна” гээд цаашдаа УИХ-ын хяналтыг хэрэгжүүлэхэд чухал алхам болж байгааг онцолсон юм.
“Төрийн аудитын байгууллагын тогтолцоо, хууль эрх зүйн орчин, бодлого, чиг хандлага, сургалт хөгжлийн үйл ажиллагааны талаар Үндэсний аудитын газрын Хөгжлийн бодлого, төлөвлөлтийн газрын захирал, тэргүүлэх аудитор Б.Бундхорол эхний илтгэлийг танилцуулав. Мөн Монгол Улсын Ерөнхий аудиторын Орлогчийн албан үүргийг түр орлон гүйцэтгэгч Ц.Наранчимэг “ТАБ-ын санхүүгийн тайлангийн аудит”, Гүйцэтгэл-нийцлийн аудитын газрын захирал, тэргүүлэх аудитор Д.Энхболд “ТАБ-ын гүйцэтгэлийн аудит” сэдвээр тус тус танилцуулга илтгэлээ сонирхууллаа.
Сургалтаар ХБТГ-ын арга зүй хариуцсан менежер, ахлах шинжээч нар “ТАБ-ын сэдэв сонгох үйл ажиллагаа”, “ТАБ-аас гаргасан аудитын шийдвэрийн хэрэгжилт”, “ТАБ-ын аудитын үр өгөөж, харилцагч талуудад зориулсан хураангуй тайлан бэлтгэх үйл явц” зэрэг сэдвийн хүрээнд танилцуулгаа хүргэв.
УИХ-ын Тамгын газрын Хяналт шалгалт, үнэлгээний газрын Төсвийн хяналт, шинжилгээний хэлтсийн дарга Д.Эрдэнэсамбуу цаашид хоёр байгууллагын хамтын ажиллагааны дагуу ТАБ-ын нэвтрүүлэн хэрэгжүүлж буй аудитын тайлангаас инфографик бэлтгэх, дата мэдээлэл боловсруулах зэрэг шинэ тутам эрэлт хэрэгцээтэй ур чадварыг эзэмшихэд чиглэсэн сургалтын талаар мэдээлэл хуваалцах сонирхолтой байгаагаа уламжиллаа.
Дархан-Уул аймаг дахь Төрийн аудитын газар “Төрөөс бүх нийтийн боловсрол олгож байгаа өнөөгийн байдал, үр дүн”-д хийсэн гүйцэтгэлийн аудит
Дархан-Уул аймаг дахь Төрийн аудитын газар “Төрөөс бүх нийтийн боловсрол…
