Аудитын дээд байгууллагуудын олон улсын байгууллага (ИНТОСАИ)-н Хөгжлийн санаачилгын Орлогч захирал хатагтай Арчана П.Ширсат, ИНТОСАИ-н Хөгжлийн санаачилгын төслийн менежер хатагтай Марита Салгрэйв, Азийн хөгжлийн банкны Хөгжлийн санхүүгийн мэргэжилтэн хатагтай Жуби Коулс, Азийн хөгжлийн банкны Санхүүгийн удирдлагын мэргэжилтэн хатагтай Тахмен Ахмад нар ажлын айлчлал хийлээ.
Ажлын айлчлалын хүрээнд “Ази номхон далайн бүс нутгийн тогтвортой гүйцэтгэлийн аудитын практик”-ийг дэмжих төслийн нэгдүгээр үе шатны ажлыг үнэлэх, хоёрдугаар шатны төлөвлөлтийн хүрээнд Төрийн аудитын байгууллагын удирдлагууд болон холбогдох албаны төлөөлөлтэй уулзалт хийж, Төрийн аудитын байгууллагын гүйцэтгэлийн аудитын менежер, аудиторуудтай хэлэлцүүлэг өрнүүлсэн юм.
Монгол Улсын Их хурлын Төсвийн байнгын хорооны дарга Г.Тэмүүлэн ИНТОСАИ-н Орлогч захирал хатагтай Арчана П.Ширсат тэргүүтэй төлөөлөгчдийг хүлээн авч уулзаж, санал солилцов. ИНТОСАИ-н Хөгжлийн санаачилгаас Монгол Улсын Үндэсний аудитын газарт “Ази номхон далайн бүс нутгийн тогтвортой гүйцэтгэлийн аудитын практик” хөтөлбөрийг хэрэгжүүлж байгааг танилцуулаад цаашид гүйцэтгэлийн аудитыг бэхжүүлэхэд санал хүлээн авахад бэлэн гэдгээ илэрхийлсэн.
Төсвийн байнгын хорооны дарга Г.Тэмүүлэн Төсвийн шинэчлэлийн хүрээнд төсөв, санхүүгийн сахилга бат, хариуцлагыг сайжруулахтай холбоотойгоор Улсын Их хурлаас Төрийн аудитын байгууллагын үйл ажиллагааг бодлогын түвшинд дэмжин ажиллаж байгааг онцолсон. Мөн цаашид Төрийн аудитын байгууллагыг бэхжүүлэх, хяналтыг сайжруулах, үйл ажиллагаа, хараат бус байдлыг сайжруулахад олон улсын туршлагыг нэвтрүүлэх зэрэг томоохон шинэчлэл хийх, холбогдох хууль эрх зүйн орчныг бүрдүүлэхээр зорьж байгааг онцлон тэмдэглэсэн.
ИНТОСАИ-н Хөгжлийн санаачилгын Орлогч захирал хатагтай Арчана П.Ширсат Монгол Улсын Төрийн аудитын байгууллага Аудитын дээд байгууллагуудын олон улсын байгууллага ИНТОСАИ, түүний Хөгжлийн санаачилгатай идэвхтэй хамтран ажилладаг хэмээгээд Төсвийн байнгын хорооны төлөөллийг өөрсдийн зохион байгуулдаг сургалт, хэлэлцүүлэгт оролцож, сайн туршлагаа хуваалцан хамтран ажиллахыг хүссэн юм.
Ажлын айлчлалын үеэр ИНТОСАИ-н Хөгжлийн санаачилгын төлөөлөл болон Азийн хөгжлийн банкны төлөөлөл Сангийн яамны Төрийн нарийн бичгийн дарга тэргүүтэй удирдлагууд, Эдийн засаг хөгжлийн яамны Төрийн нарийн бичгийн дарга тэргүүтэй төлөөлөлтэй уулзаж, гүйцэтгэлийн аудитыг бэхжүүлэхэд анхаарах асуудлын талаар харилцан санал солилцов.
ЭЗХЯ-ны Төрийн нарийн бичгийн дарга И.Батхүү Төрийн аудитын байгууллагын аудитаар өгсөн зөвлөмжийг хэрэгжүүлэн ажиллахад ихээхэн анхаарч, үүнд чиглэсэн бодлого боловсруулан ажиллаж байгаагаа дурдсан. Монгол Улсын Засгийн газар Тогтвортой хөгжлийн зорилгын хэрэгжилтэд онцгой анхаарч, үе шаттай арга хэмжээ авч ажиллаж байгаагийн дээр нийгмийн салбарыг хамарсан эдийн засгийн бодлогууд хэрэгжүүлэхээр төлөвлөсөн бөгөөд үр дүнд суурилсан төлөвлөлт, гүйцэтгэлд ТАБ-ын тавих хяналт өндөр ач холбогдолтойг онцоллоо.
Сангийн яамны Төрийн нарийн бичгийн дарга Ж.Ганбат тэргүүтэй төлөөлөлтэй хийсэн уулзалтаар мөн 2024 оноос зарим салбар чиглэлд үр дүнд суурилсан төлөвлөлт ба төсөвлөлтийг хэрэгжүүлж буйтай холбоотой хамтын ажиллагааг илүү өргөжүүлж буйг дурдлаа. Улсын төсвийн хөрөнгө оруулалтууд нэмэгдэж байгаагийн хэмжээгээр гүйцэтгэл, үр дүнд аудит хийхдээ төлөвлөлтийн уялдаа холбоог хангах арга аргачлал, олон улсын туршлагыг нэвтрүүлэх талаар саналаа уламжилсан юм.
Монгол Улсын Ерөнхий аудитор Д.Занданбат ИНТОСАИ-н Хөгжлийн санаачилгын Орлогч захирал тэргүүтэй төлөөлөгчидтэй хийсэн уулзалтаар ажлын айлчлалын үр дүнгийн талаарх танилцуулгыг сонслоо. Монгол Улсад хэрэгжүүлж буй “Ази номхон далайн бүс нутгийн тогтвортой гүйцэтгэлийн аудитын практик”-ийг дэмжих ажлын хоёрдугаар шатны үйл ажиллагааны хүрээнд манай улсын онцлог, нийгэм, эдийн засгийн байдалд нийцүүлэн зургаан үндсэн чиглэлээр хөтөлбөрийг нарийвчлан хэрэгжүүлэхээр төлөвлөсөн байна. Тодруулбал, Аудитын стратегийн төлөвлөгөө болон аудитын жилийн төлөвлөгөөний боловсруулалт, Гүйцэтгэлийн аудитын арга зүй, аргачлал, Аудитын чанарын удирдлагын тогтолцоо, Гүйцэтгэлийн аудитын мэргэжлийн боловсрол, Гүйцэтгэлийн аудитын санаачилга, Гүйцэтгэлийн аудитын үр дүн болон зөвлөмжийн мөрөөр хэрэгжүүлэх ажлын үр дүн зэрэг зургаан чиглэлээр 2025 он хүртэл дэмжлэг үзүүлэн ажиллахаар боллоо.
Дархан-Уул аймаг дахь Төрийн аудитын газар “Төрөөс бүх нийтийн боловсрол олгож байгаа өнөөгийн байдал, үр дүн”-д хийсэн гүйцэтгэлийн аудит
Дархан-Уул аймаг дахь Төрийн аудитын газар “Төрөөс бүх нийтийн боловсрол…
