Төрийн аудитын тухай хууль, Хөгжлийн бодлого, төлөвлөлт, түүний удирдлагын тухай хуулиудыг үндэслэн Төрийн аудитын байгууллагын бүрэн эрхийн хүрээнд Улсын Их Хурлын Төсвийн байнгын хорооны 2023 оны 08 дугаар тогтоолоор баталсан “Төрийн аудитын байгууллагын 2024 онд гүйцэтгэх аудитын сэдэв”, Монгол Улсын Ерөнхий аудиторын 2023 оны А/152 дугаар тушаалаар баталсан “Төрийн аудитын байгууллагын 2024 оны гүйцэтгэлийн төлөвлөгөө”-ний дагуу гүйцэтгэлийн хоёр, нийцлийн нэг аудитын нээлтийг нэгтгэн хийлээ.
“Засгийн газрын үйл ажиллагааны хөтөлбөрийн гүйцэтгэлийн тайланд аудит хийх” нийцлийн аудит болон “Улсын хөгжлийн 2023 оны жилийн төлөвлөгөөний гүйцэтгэлийн үр дүн”, “Улсын төсвийн 2023 оны хөрөнгө оруулалтын төлөвлөгөөний хэрэгжилт, үр дүн” зэрэг гүйцэтгэлийн аудитыг 2024 оны нэгдүгээр улиралд гүйцэтгэхээр төлөвлөсөн.
Аудитын нээлтийн үйл ажиллагааг Үндэсний аудитын газрын Гүйцэтгэл-нийцлийн аудитын газрын захирал, тэргүүлэх аудитор Д.Энхболд эхлүүлж, тус аудитуудын төлөвлөгөө болон аудитын явцад анхаарах шаардлагатай асуудлуудыг танилцуулав.
Аудитад хамрагдагч байгууллагуудын холбогдох албан тушаалтнууд нээлтийн үйл ажиллагаанд оролцож аудитын төлөвлөгөөг хүлээн авлаа.
Засгийн газрын үйл ажиллагааны хөтөлбөрийн гүйцэтгэлийн тайланд аудит хийхдээ Засгийн газрын үйл ажиллагааны хөтөлбөрийн зорилго бүрэн биелсэн эсэх, Засгийн газрын үйл ажиллагааны хөтөлбөрийн гүйцэтгэлийг бодитой үнэлж, тайлагнасан эсэх зорилгын хүрээнд нийцлийн аудитыг гүйцэтгэх юм.
“Улсын хөгжлийн 2023 оны жилийн төлөвлөгөөний гүйцэтгэлийн үр дүн” сэдэвт гүйцэтгэлийн аудитаар улсын хөгжлийн жилийн төлөвлөгөөг хууль, журамд заасан шаардлагад нийцүүлж, тухайн жилийн төсвийн тухай хууль, дунд хугацааны хөгжлийн бодлогын баримт бичигтэй уялдуулан боловсруулсан эсэх, улсын хөгжлийн жилийн төлөвлөгөөг үр дүнтэй хэрэгжүүлж, гүйцэтгэлийг бодитой үнэлэн, үр ашгийг тооцсон эсэхийг үзнэ.
“Улсын төсвийн 2023 оны хөрөнгө оруулалтын төлөвлөгөөний хэрэгжилт, үр дүн” сэдэвт гүйцэтгэлийн аудитаар хөрөнгө оруулалтын төсөл, арга хэмжээний холбогдох тооцоолол, баримт бичгийг үндэслэлтэй боловсруулж, санхүүжүүлсэн эсэх, хөрөнгө оруулалтын төсөл, арга хэмжээг хугацаанд нь гүйцэтгүүлж хүлээн авсан эсэх, хэрэгжсэн төсөл, арга хэмжээ нь төлөвлөсөн үр дүнд хүрсэн эсэх зэргийг үзэхээр төлөвлөөд байна.
Тус аудитуудыг 2024 оны нэгдүгээр улиралд гүйцэтгэж, аудитын тайлан, дүгнэлтүүдийг Монгол Улсын Их Хурал, холбогдох байгууллагуудад хүргүүлэх юм.
