Чулуунбаатарын СҮРЭНХОРОЛ
/1972 – 2024/
Үндэсний аудитын газрын Захиргаа, хууль эрх зүйн газрын Захиргааны менежер Чулуунбаатарын Сүрэнхорол 2024 оны 2 дугаар сарын 14-ний өдөр таалал төгссөнд талийгаачийн гэр бүл, үр хүүхдүүд, төрөл төрөгсдөд нь гүн эмгэнэл илэрхийлье.
Ч.Сүрэнхорол 1972 онд Өмнөговь аймгийн Цогтцэций суманд төрж, 1990 онд Цогтцэций сумын 10 жилийн сургууль, 1995 онд Улсын багшийн их сургууль, 2020 онд Шихихутуг их сургуулийг Эрх зүйч мэргэжлээр, 2002 онд Удирдлагын Академийг “Төрийн удирдлагын менежер”-ээр тус тус суралцан төгссөн. Мөн 2005 онд “Төрийн удирдлагын магистр”-ын зэрэг хамгаалж, 2020 оноос Монгол Улсын их сургуульд докторын зэрэг горилохоор суралцаж байсан юм.
Тэрээр Өмнөговь аймгийн Цогтцэций сумын Ардын депутатуудын хурлын гүйцэтгэх захиргаанаас ажлын гараагаа эхэлж, 1995-2001 онд Цогтцэций сумын 6-р цэцэрлэг, 10 жилийн дунд сургуульд эрхлэгчээр, 2002-2005 онуудад Цогтцэций сумын Засаг даргын тамгын газрын дарга, Цогтцэций сумын Засаг даргаар, 2006-2020 онд Өмнөговь аймгийн Засаг даргын тамгын газарт Хяналт-шинжилгээ үнэлгээний тасаг, хэлтсийн ахлах мэргэжилтэн, хэлтсийн даргаар, 2021 оноос Өмнөговь аймгийн Хөдөлмөр халамж үйлчилгээний газрын Нийгмийн халамжийн хэлтсийн даргаар ажиллаж байгаад 2022 оны 05 дугаар сараас Үндэсний аудитын газарт дэвшин ажиллаж Төрийн байгууллагад тогтвор суурьшилтай, тасралтгүй 27 жил ажилласан юм.
Ч.Сүрэнхорол нь төрийн захиргааны байгууллагад ажиллах хугацаандаа төрийн байгууллагын дотоод хяналт, хяналт-шинжилгээ, үнэлгээний чадавхыг сайжруулахад өөрийн хувь нэмрээ оруулж, 2003 онд “Монгол төрийн удирдах ажилтны манлайлал сэтгэл зүйн бэлтгэл” сэдвээр магистрын судалгааны ажил, 2019 онд “Монгол улсын нутгийн захиргааны байгууллагын дотоод хяналтын орчин, анхаарах асуудал” сэдвээр, 2021 онд “Монгол улсын нутгийн захиргааны байгууллагын үр дүнд суурилсан үнэлгээний чадавх, арга аргачлалыг сайжруулах хэрэгцээ шаардлага” сэдвээр судалгаа хийсэн. 2021 онд олон улсын “SIRPA-2021” эрдэм шинжилгээний хуралд “Монгол Улсын нутгийн захиргааны байгууллагын үр дүнд суурилсан үнэлгээний чадавх, арга аргачлалыг сайжруулах хэрэгцээ шаардлага” сэдэвт илтгэл хэлэлцүүлж “Тэргүүн байр” эзэлж байсан бөгөөд судалгаа шинжилгээний ажлыг практикт хэрэгжүүлэх чиглэлээр олон ажлыг хэрэгжүүлж байсан төрийн албан хаагч юм.
Мөн төрийн байгууллагын үйл ажиллагаанд олон улсын стандартыг нэвтрүүлэх, хэрэгжүүлэх үйл ажиллагаанд 2019 оноос эхлэн гар бие оролцож, Чанарын менежментийн тогтолцооны ISO9001:2015 стандартын тэргүүлэх аудитораар ажиллаж, 10 гаруй байгууллагад зөвлөх үйлчилгээ үзүүлж ажилласан байна.
Түүний төр, нийгэмд оруулсан хувь нэмэр, хөдөлмөр, зүтгэлийг төр засгаас өндрөөр үнэлж Хөдөлмөрийн хүндэт медаль, Төрийн албаны зөвлөлийн “Төрийн албаны тэргүүний ажилтан” цол тэмдэг, МЗХ-ны “Хөдөлмөрийн алдар” алтан медаль, Өмнөговь аймгийн Засаг даргын “Жуух бичиг”, ойн медалиудаар тус тус шагнасан байна.
Талийгаачийн хөдөлмөрч, хичээнгүй, нөхөрсөг, даруу төлөв, хүнлэг зан чанар нь бидний сэтгэл зүрхэнд үүрд хоногшин үлдэх болно.
Үндэсний аудитын газар
Үндсэн хуулийн өдрийг тохиолдуулан зохион байгуулсан танин мэдэхүйн АХА тэмцээнд нягтлан бодогч О.Мягмарсүрэн амжилттай оролцлоо.
Монгол Улсын Их Хурлын Тамгын газраас аймгийн иргэдийн Төлөөлөгчдийн Хурлын…
