Монгол Улсын Ерөнхий аудитор Д.Загджав Бүгд Найрамдах Солонгос Улсаас Монгол Улсад суугаа Онц бөгөөд Бүрэн эрхт Элчин сайд Чой Жин Вонийг 12 дугаар сарын 3-ны өдөр хүлээн авч уулзав.
Уулзалтаар Ерөнхий аудитор Д.Загджав БНСУ-тай хөгжүүлж буй “Иж бүрэн түншлэл”-ийн харилцаа гүнзгийрэн хөгжиж буйд сэтгэл өндөр байгаагаа илэрхийлээд цаашид Монгол Улсын Үндэсний аудитын газар болон БНСУ-ын Аудит, хяналтын зөвлөл хооронд 2023 онд шинэчлэн байгуулсан “Хамтран ажиллах тухай санамж бичиг”-ийн хүрээнд туршлага судлах, найрсаг хамтын ажиллагааг бэхжүүлэх боломж бүрдсэнд талархаж байгаагийн зэрэгцээ санамж бичигт дурдсан ажлууд бодитойгоор хэрэгжинэ гэдэгт итгэж байгааг илэрхийлэв.
БНСУ-ын Аудит, хяналтын зөвлөл, Аудитын судалгааны хүрээлэн, Аудитын сургалтын институт зэргээс зохион байгуулж буй мэргэжлийн сургалт болон БНСУ-ын Засгийн газраас хэрэгжүүлж буй тэтгэлэгт хөтөлбөр, дунд, богино хугацааны сургалт, семинарт албан хаагчдыг хамруулан чадавхыг бэхжүүлэх, мэргэшүүлэх талаарх тодорхой саналуудыг Элчин сайд Чой Жин Вонд уламжлав.
Элчин сайд Чой Жин Вон хоёр орны найрсаг хамтын ажиллагааг өргөжүүлэн хөгжүүлэх хүрээнд Аудитын Дээд Байгууллагын үйл ажиллагаанд бүхий л талын дэмжлэг үзүүлэн хамтарч ажиллахад таатай байхаа илэрхийлэв.
