Төрийн аудитын тухай хуулийн 6 дугаар зүйлийн 6.3.1, 6.3.3, 7 дугаар зүйлийн 7.1.2, 7.2 дахь хэсэгт заасан бүрэн эрхийн хүрээнд, Улсын Их Хурлын Төсвийн байнгын хорооны 2024 оны “Аудитын сэдэв батлах тухай” 05 дугаар тогтоолын тус тус үндэслэн “Төрөөс эрчим хүчний салбарт баримталж буй бодлого, үнэ тарифын зохицуулалт, өртөг, зардал” сэдэвт гүйцэтгэлийн аудитын нээлтийн уулзалтыг Үндэсний аудитын газарт 2025.01.20-ны өдөр зохион байгууллаа.
Монгол Улсын Ерөнхий аудиторын орлогч Я.Самбууням уулзалтыг нээж аудитын төлөвлөгөө, аудитын багийн бүрэлдэхүүнийг танилцуулан, Үндэсний аудитын газрын Гүйцэтгэл, нийцлийн аудитын газрын захирал, тэргүүлэх аудитор Д.Энхболд аудитын явцад анхаарах шаардлагатай асуудлыг танилцуулав.
Тус гүйцэтгэлийн аудитын нээлтийн уулзалтад аудитад хамрагдах Эрчим хүчний яам, Эрчим хүчний зохицуулах хороо, Эрчим хүчний үндэсний төв ТӨХХК, Диспетчерийн үндэсний төв зэрэг холбогдох байгууллагын төлөөлөл оролцлоо.
Эрчим хүчний салбарын эрх зүйн орчин, удирдлага, зохион байгуулалт, үйл ажиллагаа нь эдийн засаг, нийгмийн тогтвортой хөгжлийг хангахад чиглэж чадаж байгааг судлан дүгнэлт зөвлөмж боловсруулан зорилтот хэрэглэгчдэд хүргэх зорилготой аудит юм. Тус аудитаар эрчим хүчний салбарын тулгамдсан асуудалд ахиц дэвшил гарсан эсэх; эрчим хүчний үнэ тариф, нийлүүлэлт нь иргэд, аж ахуй эрхлэгчдийн эрх ашигт нийцэж байгаа эсэхийг үзэхдээ 2021-2024 онд гаргасан шийдвэр, үйл ажиллагаа, баримт материал, мэдээллийг хамруулан гүйцэтгэхээр төлөвлөжээ.
“Төрөөс эрчим хүчний салбарт баримталж буй бодлого, үнэ тарифын зохицуулалт, өртөг, зардал” сэдэвт гүйцэтгэлийн аудитын тайланг 2025 оны 06 дугаар сард УИХ-ын Төсвийн байнгын хороо, холбогдох байгууллагад хүргүүлэх юм.
Дархан-Уул аймаг дахь Төрийн аудитын газар “Төрөөс бүх нийтийн боловсрол олгож байгаа өнөөгийн байдал, үр дүн”-д хийсэн гүйцэтгэлийн аудит
Дархан-Уул аймаг дахь Төрийн аудитын газар “Төрөөс бүх нийтийн боловсрол…
