Төрийн аудитын тухай хуулийн 6 дугаар зүйлийн 6.3.1-д заасан Төрийн аудитын байгууллагын бүрэн эрх, Улсын Их Хурлын Төсвийн байнгын хорооны 2024 оны 05 дугаар тогтоол, Монгол Улсын Ерөнхий аудиторын 2024 оны А/108 дугаар тушаалд тус тус үндэслэн “Хүнс, хөдөө аж ахуй, хөнгөн үйлдвэрийн яамны эрхлэх асуудалд хамаарах Засгийн газрын тусгай сангууд болон “Хөдөө аж ахуйн корпораци” ТӨХХК-ийн үйл ажиллагаа, үр дүн” сэдэвт гүйцэтгэлийн аудитын нээлтийн уулзалтыг 2025 оны 2 дугаар сарын 10-ны өдөр зохион байгууллаа.
Үндэсний аудитын газрын Гүйцэтгэл, нийцлийн аудитын газрын захирал, тэргүүлэх аудитор Д.Энхболд аудитын нээлтийн уулзалтыг эхлүүлж, аудитын төлөвлөгөө болон аудитын явцад анхаарах шаардлагатай асуудлуудыг танилцуулав.
Аудитын нээлтийн уулзалтад ХХААХҮЯ-ны холбогдох албан тушаалтнууд болон “Хөдөө аж ахуйн корпораци” ТӨХХК, Зээлийн батлан даалтын сангийн удирдлагууд хүрэлцэн ирж аудитын төлөвлөгөөгөө хүлээн авлаа.
Хүнс, хөдөө аж ахуй, хөнгөн үйлдвэрийн яамны эрхлэх асуудалд хамаарах Засгийн газрын тусгай сангийн хөрөнгийн бүрдүүлэлт, зарцуулалт үр дүнтэй эсэх, “Хөдөө аж ахуйн корпораци” ТӨХХК-ийн үйл ажиллагаа, үр дүнтэй хэрэгжиж байгаа эсэх, Зээлийн батлан даалтын сангийн үйл ажиллагаа, зарцуулалт үр дүнтэй эсэхийг үзэж, шалгахад аудитын зорилго чиглэж байна.
Тус аудитад ХХААХҮЯ, Жижиг, дунд үйлдвэрийн газар, “Хөдөө аж ахуйн корпораци” ТӨХХК, Зээлийн батлан даалтын сан болон 2023, 2024 онд Жижиг, дунд үйлдвэрийг хөгжүүлэх сангаас зээл авсан иргэн, аж ахуйн нэгж, холбогдох байгууллагыг хамруулна.
