Монгол Улсын Ерөнхий аудитор Д.Загджав Унгар Улсаас Монгол Улсад суугаа Элчин сайд Обрущанский Борбала Анна-г 02 дугаар сарын 24-ний өдөр хүлээн авч уулзав.
Уулзалтаар Ерөнхий аудитор Д.Загджав Унгар Улстай хөгжүүлж буй “Гуравдагч хөрш”-ийн харилцаа гүнзгийрэн хөгжиж буйд сэтгэл өндөр байгаагаа илэрхийлээд цаашид Монгол Улсын Үндэсний аудитын газар болон Унгар Улсын Төрийн аудитын газар хооронд 2024 онд байгуулсан “Хамтын ажиллагааны хэлэлцээр”-ийн хүрээнд туршлага судлах, найрсаг хамтын ажиллагааг бэхжүүлэх боломж бүрдсэнд талархаж байгаагаа илэрхийлэв.
Түүнчлэн Унгар Улсын Засгийн газраас хэрэгжүүлж буй тэтгэлэгт хөтөлбөр, дунд, богино хугацааны сургалт, семинарт албан хаагчдыг хамруулан чадавхыг бэхжүүлэх, мэргэшүүлэх талаарх тодорхой саналуудыг Элчин сайд Обрущанский Борбала Анна-д уламжлав.
Элчин сайд Обрущанский Борбала Анна-ын зүгээс хоёр орны найрсаг хамтын ажиллагааг өргөжүүлэн хөгжүүлэх хүрээнд Аудитын Дээд Байгууллага хоорондын хамтын ажиллагаа идэвхтэй өрнөж байгаад талархал илэрхийлэв.
Мөн цаашид хоёр орны эдийн засгийн бодит хамтын ажиллагааг дэмжих, найрсаг хамтын ажиллагааг өргөжүүлэн хөгжүүлэх хүрээнд Аудитын Дээд Байгууллагын үйл ажиллагаанд бүхий л талын дэмжлэг үзүүлэн, хамтарч ажиллахаа илэрхийллээ.
