03 дугаар сарын 19-ний өдөр Улаанбаатар хот
Үндэсний Аудитын газар нь “Оюу толгой төсөлд оруулсан хөрөнгө оруулалт, санхүүжилтийн зарцуулалт, үр нөлөө” сэдэвт гүйцэтгэлийн аудитаар төслийн хөрөнгө оруулагч талаас гэрээний дагуу хийсэн хөрөнгө оруулалт, санхүүжилтийн орлого, тэдгээрийн зарцуулалт, үр нөлөөг нягтлан шалгах зэрэгт дүгнэлт гаргах зорилгоор санхүүгийн шинжээчийг сонгон шалгаруулах гэж байна.
Иймд санхүүгийн шинжээчээр зөвлөхийн үйлчилгээ үзүүлэх хүсэлтэй хувь хүн/баг/, хуулийн этгээдийг мэдүүлгээ ирүүлэхийг урьж байна.
Энэхүү үйл ажиллагаа нь Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 3 дугаар зүйлийн 3.11.Төрийн аудитын тухай хуульд заасан аудитад шинжээч оролцуулж, зөвлөх үйлчилгээ авах харилцааг энэ хуулиар зохицуулахгүй гэсэн заалт болон Монгол Улсын Ерөнхий аудиторын 2020 оны А/82 дугаар тушаалын хавсралтаар батлагдсан “Шинжээч сонгон шалгаруулах, гэрээ байгуулах, дүгнэх, гүйцэтгэсэн ажлын чанарыг хянах журам”-ын хүрээнд хэрэгжих болно.
Шинжээчээр ажиллах хувь хүн/баг/, хуулийн этгээд нь тус аудитын хүрээнд дараах ажлыг гүйцэтгэнэ. Үүнд:
- “Оюу толгой” ордын нийт хөрөнгө оруулалт, үүнээс анхны хөрөнгө оруулалтын төсөв /төлөвлөгөө/, бодит гүйцэтгэл, үр дүнг тооцох;
- “Оюу толгой” төслийн мөнгөн урсгалын тооцоолол, түүнд орсон өөрчлөлт, санхүүжилтийн эх үүсвэрийн төрөл, зээлтэй холбоотой барьцаа, санхүүжилтийн эх үүсвэрийн хүү, тэдгээрийн үр дагаврыг тооцох;
- “Оюу толгой” ХХК худалдан авагчтай байгуулсан баяжмал борлуулах гэрээ болон экспортын бүтээгдэхүүний үнэ бодитой эсэх Оюу толгой ордоос гарч буй ашигт малтмал, дагалдах бусад элементийг лабораторийн дүгнэлтээр тодорхойлж буй эсэх /газрын ховор элемент/ дүгнэлт гаргах;
- Үндсэн хөрөнгө, бусад хөрөнгийн үнэлгээ зах зээлийн үнэтэй, санхүү, нягтлан бодох бүртгэлийн ангилал НББОУС, СТОУС-тай нийцэж байгаа эсэх талаар үнэлэлт, дүгнэлт өгөх;
- Бусад хөрөнгө оруулалт /Цахилгаан хангамж, дэд бүтэц, усны хангамж, хаягдлын далан, холбогдох байгууламж, лабораторын байгууламж, засварын цех, агуулах, кемп зэрэг бусад байгууламж гэх мэт.
Ажлыг гэрээ байгуулагдсанаас хойш 7 хүртэл сарын хугацаанд гүйцэтгэх ба Оюу толгой төслийн хүрээнд 2001-2019 онуудад оруулсан хөрөнгө оруулалт, санхүүжилт, зарцуулалттай холбоотойгоор Талуудын хооронд байгуулсан гэрээ, хэлцэл, шийдвэрүүд, анхан шатны болон нягтлан бодох бүртгэл, санхүүгийн баримтууд, холбогдох бусад материалыг хамруулна.
Мэдүүлгээ ирүүлж буй зөвлөх шинжээч нь дээрх зөвлөх үйлчилгээг гүйцэтгэхээ илэрхийлсэн албан хүсэлт, зөвлөх үйлчилгээний зорилго, зорилт, хүрэх үр дүнг илэрхийлсэн хөтөлбөр аргачлал бүхий менежментийн төлөвлөгөө боловсруулан ирүүлэхээс гадна дараах мэдээллийг ирүүлнэ. Үүнд:
Хуулийн этгээд бол:
- Улсын бүртгэлийн гэрчилгээний хуулбар;
- Тусгай зөвшөөрлийн гэрчилгээний хуулбар;
- Татварын тодорхойлолт /цахим/ ;
- Нийгмийн даатгалын тодорхойлолт /цахим/;
- ШШГЕГ-ын хугацаа хэтэрсэн өр төлбөргүй талаарх тодорхойлолт;
- Шүүхийн төрөлжсөн архивын тодорхойлолт;
- ММНБИ-ын тодорхойлолт;
- Гүйцэтгэсэн адил төсөөтэй зөвлөх үйлчилгээний мэдээлэл /2018,2019,2020 он/ 3 жилээр/;
- Үндсэн ажилтны анкет, боловсрол, мэргэшлийн гэрчилгээний хуулбар;
- Үндсэн ажилтны нийгмийн даатгалын цахим лавлагаа /сүүлийн 1 жилээр/;
Сүүлийн 2 жилийн санхүүгийн тайлан аудитын дүгнэлтийн хамт /2019, 2020 оны жилийн эцсийн/.
Хувь хүн/баг бол:
- Иргэний үнэмлэхийн хуулбар
- Анкет /СV/
- Боловсрол, мэргэшлийн гэрчилгээний хуулбар
- Гүйцэтгэсэн адил төсөөтэй зөвлөх үйлчилгээний мэдээлэл /сүүлийн 3 жилээр/
- Багийн хувьд гишүүдийн хамтран ажиллах гэрээ /нотариатаар баталгаажуулсан/.
/Холбогдох тодорхойлолт нь тухайн сонгон шалгаруулалтыг зарласан цаг хугацаанд байх ба өр төлбөргүй байна./
Шинжээчид тавигдах шаардлага:
Санхүүгийн шинжээчийн бүрэлдэхүүн бизнесийн удирдлага, төрийн бодлого, санхүүгийн менежмент, хөрөнгө оруулалт, санхүүжилт, татвар, нягтлан бодох бүртгэл, санхүү эдийн засгийн чиглэлээр мэргэшсэн, дүн шинжилгээ хийх, үнэлэх чадвартай, тухайн салбарын талаар мэдлэг, дадлага, туршлагатай, хөрөнгийн үнэлгээчин болон холбогдох эрх бүхий зөвшөөрөлтэй иргэн, баг, хуулийн этгээд байх ба Санхүүгийн шинжээчийн бүрэлдэхүүн дараах мэргэжил, мэргэшлийн шаардлагыг хангасан багийн бүрэлдэхүүнтэй байна. Үүнд:
- Төрийн болон албаны, байгууллагын нууц хадгалах чадамжтай;
- Холбогдох салбарын чиглэлээр судалгаа, шинжилгээ хийж байсан туршлагатай;
- Мэргэшсэн нягтлан бодогч, Татварын итгэмжлэгдсэн зөвлөх, шинжээчийн тусгай зөвшөөрөлтэй, /Бизнесийн удирдлага, төрийн бодлого, санхүүгийн менежмент, нягтлан бодох бүртгэл, эдийн засаг, санхүү, татварын чиглэлээр өндөр хөгжилтэй оронд бакалавр, магистр болон түүнээс дээш боловсролын зэрэг хамгаалсан бол давуу тал болно/англи хэлний мэдлэгтэй /академик түвшний бол давуу тал болно/
- Компьютерын хэрэглээний программ /график, хүснэгт, тооцоолол хийх чадвар/-ыг бүрэн эзэмшсэн. Тухайлбал, Microsoft Excel, санхүүгийн программын ахисан түвшний мэдлэгтэй;
- Компьютер, техник хэрэгслийн хувьд: сүүлийн үеийн өндөр хүчин чадал бүхий i7 -с дээш CPU -тэй, 16 GB дээш RAM-тай, 500GB SSD ба түүнээс дээш, 750w GPU ба түүнээс дээш зэрэг үзүүлэлт сайтай байх.
- Багаар ажиллах чадвартай, холбогдох мэргэжлийн болон санхүү, хөрөнгө оруулалтын зөвлөх үйлчилгээний чиглэлээр 5-aaс дээш жил ажилласан туршлагатай, татвар, НДШ-ийн өргүй, зөрчилгүй байх. ААНОАТ болон бусад татвар төлсөн байх /санхүү, татварын тайлан, НД-ын тайлан шалгуур үзүүлэлт болно/
- Бусадтай хамтран ажиллах, мэдлэгээ хуваалцах чадвартай байх
- ОТ ХХК болон түүний харьяа, харилцан хамааралтай этгээдүүдтэй хамааралгүй байх.
Чадварыг нэмэгдүүлж сайжруулах зорилгоор зөвлөхүүд түншлэлийн хэлбэрээр оролцож болох ба Түншлэлийн гэрээ байгуулан баталгаажуулж ирүүлэх шаардлагатай. /Гэрээнд түншлэлийн төлөөлөх эрх бүхий гишүүн болон түншлэлийн гишүүдийг тодорхойлж, түншлэлийн гишүүд тус бүрийн гүйцэтгэх ажил, үүргийг тусгасан байна/
Жич: Зөвлөхийн мэдүүлэг ирүүлэх этгээд нь уг төслийн санхүүгийн болон бусад баримт бичгийг бэлтгэсэн, хянасан, дүгнэлт гаргасан эсхүл гэрээг хянах зөвлөхөд нэр нь дэвшигдсэн этгээдтэй нэгдмэл сонирхолтой бол санал ирүүлэх боломжгүй болохыг анхаарна уу.
Сонирхсон этгээд нь холбогдох мэдээллийг 2021 оны 03 дугаар сарын 29-ний өдрийн 17 цаг 30 минутаас өмнө авч болох бөгөөд мэдүүлгээ 2021 оны 03 дугаар сарын 30-ны өдрийн 10 цаг 00 минутын дотор ирүүлнэ үү. Хугацаа хоцорсон мэдүүлгийг хүлээн авахгүй болно.
Нэмэлт мэдээллийг авч болох албан тушаалтан: Аудитын гуравдугаар газрын Ахлах аудитор Б.Батчимэг. Утасны дугаар: ажил-261456, гар утас-99900903
Мэдүүлгийг цаасан болон цахим /pdf файл/ хэлбэрээр доорх хаягаар илгээнэ үү. Үндэсний аудитын газрын Санхүү, хөрөнгө оруулалтын хэлтсийн Худалдан авах үйл ажиллагаа хариуцсан шинжээч Н.Цэнд-Аюуш tsend-ayushn@audit.gov.mn. Гар утас: 88051068.
Захиалагчийн хаяг: 15160 Улаанбаатар хот, Чингэлтэй дүүрэг, Бага тойруу-3, Засгийн газрын IV байр, 04 дүгээр давхар,
Үндэсний Аудитын газар, Утас: 26 35 33, www.audit.mn
Дархан-Уул аймаг дахь Төрийн аудитын газар “Төрөөс бүх нийтийн боловсрол олгож байгаа өнөөгийн байдал, үр дүн”-д хийсэн гүйцэтгэлийн аудит
Дархан-Уул аймаг дахь Төрийн аудитын газар “Төрөөс бүх нийтийн боловсрол…
