Төрийн аудитын байгууллага 2021 оныг “Аудитыг цахимжуулж, нэгтгэн удирдах тогтолцоог бүрдүүлж, төлөвшүүлэх жил” болгон зарлаж өнгөрсөн оны тайлангийн хурлаа цахим хэлбэрээр зохион байгуулав. Тус хуралд ҮАГ-ын албан хаагчид оролцон цахимжуулах жилийн хүрээнд хийсэн ажлаа үнэлж, амжилт ололт, алдаа оноогоо дүгнэн хэлэлцсэн юм.
Монгол Улсын Ерөнхий аудитор Д.Занданбат хуралдааныг нээж үг хэлэхдээ“Дэлхий нийтийг хамарсан цар тахлын хүндхэн сорилтыг даван туулж буй энэ цаг үед Төрийн аудитын байгууллага орон зайнаас үл хамааран хуулиар хүлээсэн чиг үүргээ хариуцлагатай, үр нөлөөтэй хэрэгжүүлэхдээ технологийн шийдлүүдийг нэвтрүүлэн ажиллалаа. Аудитын үйл ажиллагааг цахимжуулах суурийг ийнхүү тавьж, ажилласан нь Төрийн аудитын байгууллагын хувьд 2021 оны онцлох ажил мөн. Мэдээллийн технологийн хурдацтай хөгжилтэй уялдуулан цахим орчинд ажиллах соёлыг хэвшүүлэх, улмаар бэхжүүлэхэд ТАБ-ын ажилтан албан хаагчдын идэвх, оролцоо туйлын чухал” хэмээн онцлов.
Аудитыг цахимжуулах зорилтын хүрээнд Төрийн аудитын байгууллагын мэдээллийн технологийн бодлогын баримт бичгүүдийг баталж, шалгагдагч этгээдийн бүртгэл, статистикийн мэдээ, санхүүгийн тайлангийн болон шилэн дансны аудитын мэдээллийн санг бий болгосон. Мөн тусгайлсан аудит болох сонгуулийн хандивын зардалд хяналт тавих систем болон сургалт хөгжлийн зэрэг 10 төрлийн системийг амжилттай хөгжүүлж, мэдээллийн технологийг үйл ажиллагаандаа өдөр тутам ашиглаж, илүү үр бүтээлтэй ажиллах боломж нөхцөлийг бүрдүүлээд байна.
Түүнчлэн Төрийн аудитын байгууллага нь ил тод, нээлттэй байдлыг ханган ажиллах хүрээнд иргэд олон нийт, харилцагч талуудтай харилцах, нийтийн эрх ашгийг хөндсөн асуудлаар аудитын сэдвийн саналыг цахимаар авч, эргэх холбоог сайжруулах үүднээс “Төрийн аудитын үйл ажиллагаанд иргэдийн оролцоог хангах” стратеги, “Харилцагч талуудын оролцооны стратеги”-ийг хэрэгжүүлэн ажиллаж байна. Үүний нэг жишээ нь, “Төрийн хяналтын тогтолцоо үүсэж хөгжсөний түүхт 100 жил”-ийн ойн босгон дээр “Нээлттэй аудит” www.open.audit.mn цахим портал сайтыг олон нийтийн хэрэглээнд нэвтрүүлээд байгаа талаар тус тайлангийн хурлаар онцолсон юм.
Төрийн аудитын байгууллага 2022 оныг “Аудитын чанарын хяналтын үр нөлөөг сайжруулах жил” болгон зарласан учир, албан хаагч бүр мэдлэг чадвараа хөгжүүлэх, бүтээмжээ улам бүр сайжруулах, ёс зүй, хариуцлагыг чандлан эрхэмлэж ажиллахад түлхүү анхаарал хандуулан ажиллах талаар санал бодлоо солилцлоо.
Үндсэн хуулийн өдрийг тохиолдуулан зохион байгуулсан танин мэдэхүйн АХА тэмцээнд нягтлан бодогч О.Мягмарсүрэн амжилттай оролцлоо.
Монгол Улсын Их Хурлын Тамгын газраас аймгийн иргэдийн Төлөөлөгчдийн Хурлын…
