Төрийн аудитын стандартын хорооны анхдугаар хуралдаан 2022 оны 02 дугаар сарын 28-ны өдөр Үндэсний аудитын газарт боллоо.
Төрийн аудитын тухай хуульд “Төрийн аудиттай холбоотой стандарт, аргачлал, удирдамж, зааврыг боловсруулахад мэргэжил, арга зүйн дэмжлэг үзүүлэх чиг үүрэг бүхий Төрийн аудитын стандартын хороо ажиллана гэж заасны дагуу МУ-ын Ерөнхий аудиторын тушаалаар тус хорооны дүрмийг баталж, орон тооны бус 10 гишүүний бүрэлдэхүүнтэй байгуулсан байна.
ТАСХ-ны даргаар МУЕА-ын орлогч Я. Сарансүх, гишүүдээр ҮАГ-ын төлөөлөл болон төрийн аудиттай холбоотой стандарт, аргачлал, удирдамж, зааврыг боловсруулахад эдийн засаг, санхүү, нягтлан бодох бүртгэл, эрх зүйн болон бусад чиглэлээр мэргэжил, арга зүйн дэмжлэг үзүүлэх чиг үүрэг бүхий Сангийн яам, Стандарт хэмжил зүйн газар, Монголын мэргэшсэн нягтлан бодогчдын институт, МУИС, Мандах Их Сургууль болон Грант торнтон аудит ХХК-ний төлөөллийг томилжээ.
Хуралдаанаар “Төрийн аудитын стандартын хорооны дүрэм”-ийг танилцуулж, Төрийн аудитын байгууллагын үйл ажиллагаа, хөгжлийн чиг хандлагын талаар нээлттэй санал солилцож, 2022 оны үйл ажиллагааны төлөвлөгөөг эцэслэн батлав.
МУЕА-ын орлогч Я.Сарансүх Төрийн аудитын стандартын хороог үүсгэн байгуулж буй нь ТАБ-ын түүхэнд онцгой ач холбогдолтой үйл явдал болж байгааг онцлоод, гишүүнээр элссэн холбогдох байгууллагын удирдлагуудад стандартын болон бусад баримт бичгийн төслийг хэлэлцэн шийдвэр гаргаж, МУЕА-т хүргүүлэх үндсэн чиг үүргийг хэрэгжүүлэн хамтран ажиллахдаа таатай байгаагаа илэрхийлсэн юм.
