ЗӨВЛӨХИЙН ҮЙЛЧИЛГЭЭ ҮЗҮҮЛЭХ ХҮСЭЛТЭЙ ХУВЬ ХҮН/БАГ/, ХУУЛИЙН ЭТГЭЭДЭД

Шинжээчээр хамтран ажиллах урилга хүргүүлэх тухай

Үндэсний аудитын газар нь “Улс, орон нутгийн төсвийн 2021 оны хөрөнгө оруулалтын төлөвлөгөөний  хэрэгжилт, үр дүн” сэдэвт аудитад  “Улсын төсвийн 2021 оны хөрөнгө оруулалтаар хэрэгжсэн зарим барилга байгууламжийн зураг төсөл, төсөвт өртөг, ажлын гүйцэтгэлд шинжээчийн дүгнэлт гаргах /Архангай, Баянхонгор, Өмнөговь аймгууд 3 ТАХ/” зорилгоор шинжээч сонгон шалгаруулж, зөвлөх үйлчилгээний гэрээ байгуулан хамтран ажиллахаар төлөвлөж байгаа тул зөвлөхийн үйлчилгээ үзүүлэх хүсэлтэй хувь хүн/баг/, хуулийн этгээдийг мэдүүлгээ ирүүлэхийг урьж байна.

Энэхүү үйл ажиллагаа нь Монгол Улсын Ерөнхий аудиторын 2020 оны А/82 дугаар тушаалаар батлагдсан “Шинжээч сонгон шалгаруулах, гэрээ байгуулах, дүгнэх, гүйцэтгэсэн ажлын чанарыг хянах журам”-ын хүрээнд хэрэгжих болно.

Шинжээч нь ҮАГ-АД/22-005 дугаартай ажлын даалгаварт тусгагдсан 3 төсөл арга хэмжээний батлагдсан зураг төсөл, төсөв болон ажлын гүйцэтгэлд дүгнэлт гаргах ажлыг 2022 оны 05 дугаар сарын 31-ний өдрийг дуустал хугацаанд хэрэгжүүлнэ.

Шинжээч нь төсөл, арга хэмжээ бүрээр дараах ажилбаруудыг гүйцэтгэж, аудитын талбарын болон тайлагналын үе шатанд аудитын багийг мэргэжил, арга зүйгээр хангана. Үүнд:

  1. Барилга, байгууламжийн зураг төсөл нь холбогдох хууль тогтоомж, стандарт, норм, дүрмийн шаардлагыг хангаж, төлөвлөлт, судалгаанд үндэслэсэн эсэхэд шинжээчийн дүгнэлт гаргах;
  2. Барилга, байгууламжийн төсвийг баталсан зураг төслийн дагуу холбогдох хууль тогтоомж, стандарт, жишиг, норм, үнэлгээний дагуу үнэн зөв, бодитой зохиож, магадлалаар баталгаажуулсан эсэхэд дүгнэлт гаргах;
  3. Барилга байгууламжийн суурь, бүтээц, угсралтын ажлыг зураг төсөл, техникийн шаардлагын дагуу хийсэн эсэхэд дүгнэлт гаргах;
  4. Барилга, байгууламжийн гүйцэтгэлийн үе шатны ажлуудад хяналт тавьсан байдал, өгсөн зааварчилгаа, түүнийг хэрэгжүүлж ажилласан байдлыг нягтлан шалгаж, дүгнэлт гаргах;
  5. Барилга, байгууламжийг ашиглалтад оруулах техникийн болон улсын комисс ажилласан бол тэдгээрээс өгсөн үүрэг даалгаврыг хэрэгжүүлсэн байдалд дүгнэлт гаргах;
  6. Шинжээчийн дүгнэлт гаргах ажлын явцад орц, материалын тоо хэмжээ, нэр төрөл, чанар, агууламж зэргийг баталж, хянаж баталсан төсөв болон бодит гүйцэтгэл хооронд зөрүү илэрсэн тохиолдолд гүйцэтгэлийн өртөгт үзүүлэх нөлөөллийг тогтоож, төсөвт гарсан хэмнэлт, хэтрэлтийг тоо хэмжээ болон үнийн дүнгээр гаргах.

Шинжээч нь ажлын даалгаварт заасан ажилбаруудыг мэргэжлийн болон чанарын өндөр түвшинд гүйцэтгэж,  гэрээт ажлын хүрээнд хамрагдсан барилга, байгууламжийн зураг төсөл, төсөвт өртөг нь холбогдох хууль тогтоомж, дүрэм журам, норм, норматив, стандартаар тавигдах бусад шаардлагуудыг хангасан эсэх, барилга, байгууламжийг техникийн шаардлагын дагуу барьж ашиглалтад оруулсан эсэхийг хянан үзэж, мэргэжлийн дүгнэлт гарган үр дүнг тусгасан шинжээчийн тайланг төсөл, арга хэмжээ бүрээр бэлтгэнэ. Барилга угсралтын ажил бүрэн дуусаагүй төсөл, арга хэмжээний хувьд ажлын гүйцэтгэлд иж бүрэн дүгнэлт гаргах боломжгүй тул шаардлагатай нэр төрлийн ажлын гүйцэтгэлд аудитын багтай тохиролцож, шинжээчийн дүгнэлт гаргана.

Шинжээчийн тайланд дүгнэлт гаргах явцад илэрсэн алдаа зөрчил, тэдгээрийн учир шалтгаан болон үр дагавар, эрсдэлд хийсэн дүн шинжилгээний үр дүнгээс гадна цаашид анхаарах асуудлын талаар зөвлөмж, санал боловсруулж тусгана.

Шинжээчийн тайлан болон хавсралтаар гаргасан судалгаа, тооцоолол, бусад нотлох зүйлс, ажлын баримт материалыг цаасан болон цахим хэлбэрээр гэрээнд заасан хугацаанд аудитын багт хүлээлгэн өгнө.

Мэдүүлгээ ирүүлж буй хувь хүн/баг/, хуулийн этгээд нь дээрх зөвлөх үйлчилгээг гүйцэтгэхээ илэрхийлсэн албан хүсэлт ирүүлэхээс гадна дараах мэдээллийг ирүүлнэ.

Үүнд:  Хуулийн этгээд бол:

-Улсын бүртгэлийн гэрчилгээний хуулбар;

-Татварын өргүй тухай тодорхойлолт/цахимаас татан авсан/;

-Нийгмийн даатгалын шимтгэлийн өргүй тодорхойлолт/цахимаас татан авсан/;

-Шүүхийн төрөлжсөн архивын тодорхойлолт;

-Гүйцэтгэсэн ижил төстэй зөвлөх үйлчилгээний мэдээлэл сүүлийн 3 жилээр /2019,2020,2021он/;

– Ажилтны анкет, боловсрол, мэргэшлийн гэрчилгээний хуулбар;

– Ажилтны нийгмийн даатгалын цахим лавлагаа /сүүлийн 1 жилээр/;

–  Сүүлийн 2 жилийн санхүүгийн тайлан, аудитын дүгнэлтийн хамт /2020, 2021 он/

Хувь хүн/баг бол:

–     Иргэний үнэмлэхийн хуулбар;

–     Анкет /СV/;

–     Боловсрол, мэргэшлийн гэрчилгээний хуулбар;

–     Гүйцэтгэсэн ижил төстэй зөвлөх үйлчилгээний мэдээлэл /сүүлийн 3 жилээр/;

–     Багийн хувьд гишүүдийн хамтран ажиллах гэрээ /нотариатаар баталгаажуулсан/:

Шинжээч нь Монгол Улсын Төсвийн тухай хуулийн хүрээнд хэрэгжиж байгаа төсөл, арга хэмжээ, барилга, байгууламжийн ТЭЗҮ, зураг төсөл, төсөв боловсруулах, магадлал хийх, дүгнэлт гаргах эрх бүхий, төсвийн хөрөнгө оруулалтын үр ашиг, эдийн засгийн үр өгөөжийг тооцох, үнэлэх талаар мэргэшсэн, энэ чиглэлээр дүгнэлт гаргаж байсан, техникийн үйлчилгээ үзүүлж чадахуйц, тухайн салбарт ажиллаж байгаа болон ажлын дадлага, туршлагатай иргэн, хуулийн этгээд байна.

Аудитын явцад олж авсан болон мэдсэн төр, байгууллага, хувь хүний нууцад хамаарах мэдээллийн нууцлалыг хадгалах ба гэрээгээр тохиролцсон ажилд оролцож дүгнэлт гаргах үйлчилгээ үзүүлэхдээ мэргэжлийн болон ёс зүйн өндөр түвшинд шударгаар ажиллаж, төрийн аудитын байгууллагын ажилтны ёс зүйн дүрмийг нэгэн адил даган мөрдөж ажиллана.

Шинжээч нь хууль тогтоомжид нийцсэн шаардлагын дагуу ашиг сонирхлын зөрчилгүй гэдгээ бүрэн илэрхийлсэн мэдэгдлийг гаргаж, албан үүрэгт хөндлөнгөөс нөлөөлөх байдал үүсвэл эрх бүхий албан тушаалтанд нэн даруй мэдэгдэх бөгөөд Үндэсний аудитын газартай иж бүрэн түншлэлийн чиглэлээр нэгдмэл сонирхолтойгоор хамтран ажиллана.

Шинжээчийн ажлын хүрээнд мэргэшсэн, тухайн салбарт ажиллаж ирсэн ажлын дадлага, туршлагатай, зөвлөх үйлчилгээ үзүүлэх иргэн, хуулийн этгээд /түншлэлээр оролцох/-тэй хамтран ажиллах бөгөөд зөвлөх үйлчилгээг багаар үзүүлнэ. Гэрээт ажлыг гүйцэтгэх шинжээчийн багт дараах шаардлага тавигдана. Үүнд:

  • Багийн ахлагч нь барилгын инженер, Монгол Улсын зөвлөх инженер, тэргүүлэх төсөвчин, магистр буюу түүнээс дээш зэрэгтэй, мэргэжлээрээ 15 ба түүнээс дээш жил ажилласан ажлын туршлагатай байх;
  • Багийн гишүүд нь мэргэшсэн инженер, бакалавр буюу түүнээс дээш зэрэгтэй, мэргэжлээрээ 5 ба түүнээс дээш жил ажилласан ажлын туршлагатай байх;

–  Судалгаа шинжилгээний болон шинжээчийн ажлын туршлагатай байх.

Сонирхсон этгээд нь холбогдох мэдээллийг 2022 оны 04 дүгээр сарын 05-ны өдрийн 10 цаг 00 минутаас өмнө авч болох бөгөөд мэдүүлгээ 2022 оны 04 дүгээр сарын 05-ны өдрийн 10 цаг 10 минутын дотор цахим хаягаар /tsend-ayushn@audit.gov.mn, info@audit.gov.mn/ pdf файл хэлбэрээр ирүүлнэ үү. Хариуцсан ажилтан: Үндэсний аудитын газрын Санхүү, хөрөнгө оруулалтын хэлтсийн Худалдан авах үйл ажиллагаа хариуцсан шинжээч Н.Цэнд-Аюуш. Гар утас: 88051068

Захиалагчийн хаяг: 15160 Улаанбаатар хот, Чингэлтэй дүүрэг, Бага тойруу-3,

Засгийн газрын IV байр, 409 тоот өрөө. Үндэсний Аудитын газар. Утас: 51-26 35 33. www.audit.mn.