Европын аюулгүй байдал, хамтын ажиллагааны байгууллагын Ардчилсан институт, Хүний эрхийн газраас Монгол Улсын Ерөнхийлөгчийн 2021 оны ээлжит сонгуулийн явц, үр дүнг ажигласан тайлангаа ҮАГ-ын зарим удирдлагад танилцуулж, санал солилцлоо.
Энэхүү тайланд Монгол Улсын Ерөнхийлөгчийн 2021 оны ээлжит сонгууль ЕАБХАБ-ын өмнө хүлээсэн үүрэг, ардчилсан сонгуультай холбогдох олон улсын бусад үүрэг, хэм хэмжээ болон дотоодын хууль тогтоомжтой нийцэж байгаа эсэхийг тодорхойлох зорилгоор ажиглалт хийж, нарийвчилсан үнэлгээ өгснийг дурджээ.
Уулзалтын эхэнд ЕАБХАБ-ын АИХЭГ-ын Сонгууль ажиглах тусгай хорооны тэргүүн Лолита Чигане тус хорооноос өгсөн зөвлөмжүүдийн талаар танилцуулаад, мэдээлэлд тулгуурласан сонголт хийх чадавхыг нэмэгдүүлэх үүднээс сонгуулийн санал авах өдрөөс өмнө нэр дэвшигчдийн орлогыг ил тод болгох боломжийг бий болгох шаардлагатай байгааг тайланд тусгасан гэдгийг онцоллоо.
ҮАГ-ын Хөгжлийн бодлого, төлөвлөлтийн газрын захирал, тэргүүлэх аудитор Б.Бундхорол “Сонгуулийн үйл явцыг сайжруулах үйл ажиллагаанд дэмжлэг үзүүлэн, ажиглалтын тайлангаа ирүүлсэн та бүхэнд талархал илэрхийлье.
Төрийн аудитын байгууллага сонгуулийн үйл ажиллагаатай холбоотой аудитыг гүйцэтгэхдээ нэр дэвшигчийн мөрийн хөтөлбөр нь улс орны хөгжлийн үзэл баримтлалтай нийцсэн эсэх, амлалтын шинж чанартай, сонгуульд зарцуулах зардлын дээд хэмжээнээс хэтэрсэн зорилт, арга хэмжээ тусгагдсан эсэх болон сонгуулийн зардал үнэн, бодитой байгаа талаар дүгнэлт гаргадаг.
Мөн бид төрийн аудитын үйл ажиллагаанд орчин үеийн мэдээллийн технологийн арга, хэлбэрийг нэвтрүүлэхийг зорьж ажиллаж байгаа бөгөөд энэ ажлын нэг хэсэг болох сонгуулийн хандивын тайланд хяналт тавих системийг өнгөрөгч хугацаанд нэвтрүүлсэн. Энэхүү системийн тусламжтайгаар 2021 онд зохион байгуулагдсан Монгол Улсын Ерөнхийлөгчийн ээлжит сонгуульд нэр дэвшигч нь сонгуулийн санхүүжилтээ хуулиар хүлээн зөвшөөрсөн, бодитой эх үүсвэрээс бүрдүүлж, зориулалтын дагуу зарцуулсан талаар тайлагнах, түүнд дүгнэлт гаргах нөхцөлийг бүрдүүлсэн.
Сонгуулийн тогтолцоог сайжруулах, сонгогчдыг ил тод нээлттэй мэдээллээр хангах, холбогдох хууль эрх зүйн орчныг сайжруулахад тайланд тусгагдсан зөвлөмжүүд үнэ цэнтэй хувь нэмэр оруулна гэдэгт итгэлтэй байна” хэмээгээд Сонгууль ажиглах тусгай хорооны хамт олонд амжилт хүслээ.
Алсын хараа
АЛСЫН ХАРАА Монгол Улсын хөгжлийн бодлого, зорилтуудыг хэрэгжүүлэхэд чиглэсэн эдийн…
