МОНГОЛ УЛСАД ТӨРИЙН ХЯНАЛТЫН ТОГТОЛЦОО ҮҮСЭЖ ХӨГЖСӨНИЙ 100 ЖИЛИЙН ОЙН ХҮНДЭТГЭЛИЙН ХУРАЛ БОЛЛОО

Монгол Улсад Төрийн хяналтын тогтолцоо үүсэж, хөгжсөний түүхт 100 жилийн ой энэ өдрүүдэд тохиож байна. Өнөөдөр Монгол Улсад Төрийн хяналтын тогтолцоо үүсэж, хөгжсөний 100 жилийн ойн хүндэтгэлийн хурал боллоо. Энэхүү хүндэтгэлийн хуралд үе үеийн Монгол Улсын Ерөнхий аудиторууд, Төрийн аудитын байгууллагад ажиллаж байсан ахмад ажилтнууд, аймаг, нийслэл дэх Төрийн аудитын газрын албан хаагчид болон одоо ажиллаж буй ажилтнууд оролцсон юм.

Монгол Улсын Их Хурлын дарга Г.Занданшатар хүндэтгэлийн хурлыг нээж үг хэлж, 100 жилийн түүхт Төрийн аудитын байгууллагын хамт олныг тангарагтаа үнэнч байж төр ард түмний өмнө хүлээсэн үүргээ нэр төртэйгөөр биелүүлэхийг хүсэв.

Улсын Их Хурлын дарга Г.Занданшатар хэлсэн үгэндээ “БНМАУ-ын Анхдугаар Үндсэн хуулийн “Улсын дээд эрхийг барих газрын тухай” бүлэгт “Засгийн газар бол тус улсын ерөнхийлөн захирах газар мөн”-ийг тодорхойлоод, “Улсын хянан байцаагч” хэмээх албан тушаалтан нь Засгийн газрын гишүүн байхаар заасан нь төрийн хянан шалгах байгууллагын үүрэг, ач холбогдлыг Монголын төр анхнаасаа ямагт эрхэмлэж ирсний нэгэн баталгаа юм.

Монгол Улсын Их Хурал Төрийн аудитын байгууллагын эрх зүйн орчныг Үндсэн хуулийн үзэл баримтлалд нийцүүлэн улам боловсронгуй болгоход онцгой анхаарч ирсэн бөгөөд цаашид ч олон улсын жишигт нийцсэн төрийн хяналтын шилдэг тогтолцоо бүрдүүлэн төлөвшүүлэхийн төлөө хичээн чармайх болно” гэдгийг тодотгож байлаа. Мөн Монгол Улсад Төрийн хяналтын тогтолцоо үүсэж, хөгжсөний 100 жилийн ойд зориулсан хүндэтгэлийн хуралд оролцогчдод Монгол Улсын Ерөнхийлөгч У.Хүрэлсүх илгээлт мэндчилгээ Эдийн засгийн бодлогын зөвлөх Б.Даваадалай уламжлав.

Монгол Улсын Ерөнхий сайд Л.Оюун-Эрдэнийн Монгол Улсад Төрийн хяналтын тогтолцоо үүсэж, хөгжсөний 100 жилийн ойн хүндэтгэлийн хуралд амжилт хүсэж, илгээлт хүргүүлснийг түүний Эдийн засаг, гадаадын хөрөнгө оруулалт хариуцсан зөвлөх Д.Ирмүүн танилцуулан хүргэлээ.

Монгол Улсын Ерөнхий аудитор Д.Занданбат “Төрийн хяналтын тогтолцоо-100” уламжлал, шинэчлэл, хөгжлийн чиг хандлага сэдвээр илтгэл тавьж, Төрийн хяналтын тогтолцооны үүсэл хөгжил, цаашдын хөгжлийн чиг хандлагыг хэрхэн тодорхойлж буйг онцоллоо.

Ерөнхий аудитор Д.Занданбат илтгэлдээ, “Бид цаашдаа, “Монгол Улсын ирээдүйд тулгарч болзошгүй эрсдэл”-ээс сэргийлсэн, улс, нийгмийн бүх салбарт тулгарах “эрсдэлийг удирдах тогтолцоотой” болох хийгээд түүнд чиглэсэн шинэ зорилт, агуулгаар тулгуур аудитыг гүйцэтгэж, “Төрийн аудитыг улсын эдийн засаг, нийгмийн хөгжлийн түлхүүр хэрэгсэл” болгоход анхаарч ажиллах ёстой. Ирж буй зууны шинэ хуудсыг бичиглэхэд, уламжлал, шинэчлэлийн зохистой харьцаанд суурилсан хөндлөнгийн хараат бус хяналтын хөгжлийн суурийг улам баталгаажуулан, алсын хараатай, байнгын, төр, түмний хүсэл эрмэлзлийг биелүүлсэн хүчтэй хөдөлгөгч, хариуцлагын орчлыг бий болгосон улс, нийтийн өмч хөрөнгөд нягт нарийн хяналтыг хэрэгжүүлэх хараат бус, үр ашигтай, итгэл даасан, үнэн зөв ойлголтын найдвартай эх үүсвэр болсон АУДИТЫН ТОГТОЛЦООГ ХӨГЖҮҮЛЭХ ЧИГ ХАНДЛАГЫГ баримтлах болно. Бид, төрийн бодлого шийдвэрийн хэрэгжилт, гүйцэтгэлийн үнэн зөв байдалд итгэл олж авах, иргэдийн амьдралд эерэг өөрчлөлт авчрахад Төрийн Аудитын байгууллага дуу хоолойгоо хүчтэй хүргэсээр байх болно” гэдгийг дурдсан юм.

УИХ-ын Төсвийн байнгын хорооны дарга Ч.Хүрэлбаатар мэндчилгээ дэвшүүлж амжилт хүсэв. Төрийн аудитын байгууллагын ахмадуудыг төлөөлж Монгол Улсын Ерөнхий аудитораар 2009-20112 онд ажиллаж байсан, гавьяат эдийн засагч Ч.Раднаа баяр хүргэж үг хэлсэн. Мөн орон нутгийн Төрийн аудитын байгууллагыг төлөөлж Дундговь аймаг дахь Төрийн аудитын газрын менежер Х.Наранцацрал үг хэллээ. Төрийн аудитын байгууллагатай гэрээгээр санхүүгийн тайлангийн аудитыг гүйцэтгэгч нийт 52 компанийг төлөөлж “Гранд Торнтон Аудит” ХХК-ийн гүйцэтгэх захирал О.Идшинринжин үг хэлсэн юм.

Хүндэтгэлийн хурлыг хааж хэлсэн үгэндээ Үндэсний аудитын газрын Тамгын дарга С.Цэрэнбаяр “Шинэ зууны эхлэл дээр бид өнгөрсөн нэгэн зууныхаа алдаа оноог дэнсэлж, ирэх зууны өнгийг тодорхойлж, “Төрийн санхүү, төсвийн хяналтыг хараат бусаар хэрэгжүүлж, харилцагч талуудын хамтын ажиллагааг өргөжүүлэх замаар иргэдийн амьдралыг сайжруулах” эрхэм зорилгоо биелүүлэх нэр хүндтэй эрхэм үүрэг Та бидэнд оногдож байна” хэмээн тодотгов.