Үндэсний аудитын газар Европын холбооны санхүүжилттэй “Монгол Улсад Тогтвортой хөгжлийн зорилготой уялдсан төсвийн төлөвлөлтөөр хөдөлмөр эрхлэлтийн шинэчлэлийг дэмжих нь” төсөлтэй хамтран “Үр дүнд суурилсан төлөвлөлт болон төсөвлөлтийн арга зүй” сургалт-семинарыг 2022.12.13-ны өдөр зохион байгууллаа.
Сургалт-семинарт Үндэсний аудитын газар болон Нийслэл дэх Төрийн аудитын газрын нийт 80 орчим албан хаагч оролцсон юм. НҮБ-ын Хөгжлийн хөтөлбөрийн төслийн зөвлөхүүд “Үр дүнд суурилсан нэгдсэн удирдлагыг хэрэгжүүлсэн олон улсын туршлага”, “Үр дүнд суурилсан төлөвлөлт: Үндэсний болон салбарын үр дүн”, “Орон нутгийн хөгжлийн бодлого, төлөвлөлтийн уялдаа”, “Төсвийн гүйцэтгэлтийн тайлагнал, шинжилгээ”, “Төсвийн бодлогын үнэлгээ, Засгийн газрын болон төсвийн хөтөлбөрт гүйцэтгэлийн аудит хийх нь” сэдвийн хүрээнд сургалт семинарыг хөтлөн явууллаа.
НҮБ-ын Хөгжлийн хөтөлбөрийн хэрэгжүүлж буй “Тогтвортой хөгжлийн зорилготой уялдсан төсвийн төлөвлөлтөөр хөдөлмөр эрхлэлтийн шинэчлэлийг дэмжих” төслөөс Төрийн аудитын байгууллагын албан хаагчдад зориулан “Тогтвортой хөгжлийн зорилгын хэрэгжилтийн аудит” сэдвээр цахим сургалтыг зохион байгуулахаар төлөвлөөд байгаа юм.
