Гүйцэтгэл-нийцлийн аудитын газрын аудиторууд олон улсын хэлэлцүүлэг-сургалтад оролцож байна

Филиппин улсын Манила хотод 3 дугаар сарын 3-наас 10-ны өдрийг хүртэл үргэлжлэх Гүйцэтгэлийн аудитад Аудитын дээд байгууллагын олон улсын стандартын (АДБОУС)-ын хэрэгжилтийг үнэлэх аргачлал, ажлын төлөвлөгөөг боловсруулах олон улсын хэлэлцүүлэг-сургалтад Үндэсний аудитын газрын Гүйцэтгэл-Нийцлийн аудитын газрын захирал, тэргүүлэх аудитор Д.Энхболд, аудитын менежер Х.Баярмаа, аудитор Э.Уужимсан нар оролцож байна.

Хэлэлцүүлэг-сургалтаар урьдчилан боловсруулсан үнэлгээний ажлын төлөвлөгөөнд улс орнууд харилцан түншийн үнэлгээ хийх, үнэлгээний шалгах маягтуудад санал солилцох, үнэлгээ хийхэд тулгарч болзошгүй эрсдэл, түүнийг хэрхэн удирдах, үнэлгээний арга зүй, түүврийн төлөөлөл, баримтжуулалтыг хангах зэрэг асуудлыг хэлэлцэж шийдвэрлэх юм.

Тухайн төслийн үр дүнгээр гүйцэтгэлийн аудитын олон улсын стандартын хэрэгжилт хангалтгүй хэсгийг тодорхойлж, улмаар ирээдүйн хэрэгцээг тодорхойлж, сайжруулалт хийх шаардлагатай үйл ажиллагааг Аудитын дээд байгууллагын  бодлого, арга зүй, холбогдох газрын хяналтын чиг үүргээр албажуулах, стандартыг тогтвортой мөрдөх үйл ажиллагааг төлөвшүүлэх зорилготой.

Азийн хөгжлийн банкны санхүүгийн дэмжлэгтэйгээр Аудитын дээд байгууллагын олон улсын байгууллага, хөгжлийн санаачилга нь Монгол Улсын Аудитын дээд байгууллагын хамтын ажиллагааны хүрээнд Гүйцэтгэлийн аудитад Аудитын дээд байгууллагуудын олон улсын стандартын хэрэгжилтийг хэрхэн хангаж ажиллаж буй байдалд үнэлгээ хийх төслийг хэрэгжүүлж эхлээд байна.

Энэхүү төслийн хүрээнд үнэлгээ хийх төлөвлөгөөг боловсруулах, АДБОУС-ын гүйцэтгэлийн аудитын тайлан болон баримтжуулалтын үйл ажиллагааг үнэлэх ажлын хэсгийг Монгол Улсын Ерөнхий аудиторын тушаалаар байгуулан ажиллаж байгаа юм.