Азийн хөгжлийн банк, БНСУ-ын Цахим Ази, мэдлэгийн түншлэлийн сангийн дэмжлэгтэй “Төрийн аудитын байгууллагын чадавхыг бэхжүүлэх” төсөл амжилттай хэрэгжиж, хаалтын арга хэмжээг 2023.04.17-ны өдөр зохион байгууллаа.
Төрийн аудитын байгууллагын үйл ажиллагаанд түншийн үнэлгээ хийж, зөвлөмж гаргах, Төрийн аудитын байгууллагын цахим мастер төлөвлөгөө болон сургалт хөгжлийн стратеги боловсруулах зэрэг хэд хэдэн томоохон ажлыг тус төслийн хүрээнд амжилттай хийж гүйцэтгээд байна.
Төслийн хаалтын арга хэмжээг нээж, Монгол Улсын Ерөнхий аудитор Д.Занданбат үг хэлэхдээ, Төрийн аудитын байгууллагад үр өгөөжөө өгсөн энэхүү төсөл амжилттай хэрэгжиж, амжилт ололт арвинтай ийн хаалтаа хийж байгаа нь цаашдын хамтын ажиллагаанд чухал нөлөө үзүүлж байгааг тодотгов. Тэрбээр, “Аудитад мэдээллийн технологийн дэвшилтэт системийг ашиглаж, хөгжүүлэн ажилласнаар ил тод байдал, аудитын чанар, хүртээмжийг дээшлүүлж буй энэ цаг үед “Төрийн аудитын байгууллагын чадавхыг бэхжүүлэх” төсөл хэрэгжиж байгаа нь цаг үеэ олсон нэгэн чухал үйл явдал болж байна” хэмээгээд дэмжин ажилласан Азийн хөгжлийн банкны удирдлагууд болон төслийн нэгжийн хамт олонд талархал илэрхийлэв.
Азийн хөгжлийн банкны Монгол дахь суурин төлөөлөгч Павит Рамачандран төслийн хаалтын арга хэмжээнд оролцож, өнгөрсөн 30 жилийн хугацаанд Монгол Улсын төрийн болон хувийн салбарт олон төсөл хөтөлбөр амжилттай хэрэгжүүлсний дотор Азийн хөгжлийн банкны санхүүжилттэй төслүүдэд Үндэсний аудитын газар дэмжлэг үзүүлэн манлайлан хамтран ажилласанд талархаж буйгаа илэрхийлсэн. Мөн тэрбээр, АХБ-ны санхүүжилттэй төслүүдийн 2022 оны санхүүгийн тайланд аудит хийх үйл ажиллагаанд Үндэсний аудитын газрын оролцоо, үүрэг ихээхэн чухал ач холбогдолтой байсныг онцлон дурдлаа.
Цахим хэлбэрээр арга хэмжээнд оролцогчдоос Үндэсний аудитын газарт ажиллаж, түншийн үнэлгээ хийж, холбогдох зөвлөмжүүд өгсөн багийн ахлагч Австралийн Үндэсний аудитын газрын Мэргэжлийн үйлчилгээ, харилцааны группийн захирал Кристиан Хари үнэлгээгээ танилцуулсан бол “Эрнст Янг” компанийн Бүгд найрамдах Энэтхэг улс дахь салбарын захирал Вайбхав Хари Төрийн аудитын байгууллагын цахим мастер төлөвлөгөө боловсруулах зөвлөх үйлчилгээний талаар мэдээлэл хийсэн. Мөн сургалт хөгжлийн стратеги боловсруулахаар Үндэсний аудитын газарт хүрэлцэн ирж ажилласан Английн Төрийн санхүү, нягтлан бодох бүртгэлийн мэргэшсэн институтийн зөвлөх, багийн ахлагч Кевин Хугхес сургалтын зөвлөх үйлчилгээний талаар танилцуулга хүргэсэн юм.
Үүний дараа АХБ-ны Монгол дахь суурин төлөөлөгчийн газрын Худалдан авалт хариуцсан ахлах мэргэжилтэн, багийн ахлагч Ж.Батцэнгэл Төрийн аудитын байгууллагад хэрэгжүүлсэн төслийг дэмжин хамтран ажилласан талуудад талархал илэрхийлэв.
Үндэсний аудитын газрын Тамгын дарга С.Цэрэнбаяр “Төрийн аудитын байгууллагын чадавхыг бэхжүүлэх” төслийн хүрээнд боловсруулагдсан чухал стратегийн баримт бичгүүдийг хэрэгжүүлэх дараагийн төслүүдийг дэмжиж, цаашид хамтран ажиллана гэдэгтээ итгэлтэй байгааг илэрхийлж, төслийг санхүүжүүлсэн Азийн Хөгжлийн банк, БНСУ-ын Цахим Ази, мэдлэгийн түншлэлийн сан, АХБ-ны төслийн баг, төсөл хэрэгжүүлэх нэгж, дэмжлэг үзүүлсэн ҮАГ-ын газрууд, холбогдох албан тушаалтнуудад талархсанаа уламжиллаа.
Алсын хараа
АЛСЫН ХАРАА Монгол Улсын хөгжлийн бодлого, зорилтуудыг хэрэгжүүлэхэд чиглэсэн эдийн…
