ГҮЙЦЭТГЭЛИЙН АУДИТЫН ТӨГСГӨЛИЙН УУЛЗАЛТЫГ ЗОХИОН БАЙГУУЛЛАА.

Архангай аймаг дахь Төрийн аудитын газар нь Төрийн аудитын тухай хуулийн 6 дугаар зүйлийн 6.3.1-д заасан бүрэн эрхийн хүрээнд Улсын Их Хурлын Төсвийн байнгын хорооны 2022 оны “Аудитын сэдэв батлах тухай” 09 дүгээр тогтоол, Монгол Улсын Ерөнхий Аудиторын 2023 оны “Аудитын жилийн төлөвлөгөө батлах тухай” А/04 дүгээр тушаал, аймаг дахь Төрийн аудитын газрын 2023 оны гүйцэтгэлийн төлөвлөгөө, Монгол Улсын Ерөнхий Аудиторын баталсан аудитын төлөвлөгөөг үндэслэн “Улс, орон нутгийн төсвийн 2022 оны хөрөнгө оруулалтын төлөвлөгөөний хэрэгжилт, үр дүн ”-д хийсэн гүйцэтгэлийн аудитын төгсгөлийн уулзалт, хэлэлцүүлгийг 2023 оны 04 дүгээр сарын 25-ны өдөр хийлээ.

Уулзалтад аймаг дахь Төрийн аудитын газрын дарга, Тэргүүлэх аудитор Т.Байгалмаа, аудитын менежер Д.Нэргүйбаатар, ахлах аудитор Х.Алтанчимэг, Н.Алтантуяа, аудитор Г.Цог-Эрдэнэ, Л.Соёлмөнх болон аймгийн Засаг дарга Б.Цэрэннадмид, аймгийн ИТХ-ын НБДарга, аймгийн ЗДТГ-ын ХОХБТХ, СТСХ, ОНӨГ, ГХБХБГ-ын удирдлага болон холбогдох албан тушаалтнууд, орон нутгийн “АВ” телевиз оролцлоо.

Аудитын тайлан илэрсэн асуудал, шийдвэрийн талаар харилцагч болон шалгагдагч байгууллагуудад танилцуулга хийж, аудитын шийдвэрийг хэрэгжүүлэх арга замын талаар хэлэлцүүлэг зохион байгууллаа.

Аудитаар хөрөнгө оруулалтын худалдан авах ажиллагааг хуулийн дагуу зохион байгуулаагүй, гэрээний хугацаанд гүйцэтгээгүй, ажлыг дутуу чанаргүй гүйцэтгэсэн, хөрөнгө оруулалтын ажлыг бүртгэл тайланд тусгаагүйтэй холбоотой 16,971.3 сая төгрөгийн зөрчил илэрсэнд зөрчлийг таслан зогсоох, чанаргүй, дутуу гүйцэтгэсэн ажлыг гүйцэтгэгч байгууллагаар бүрэн дуусгах, захиалагчийн хяналтыг сайжруулах арга хэмжээ авах 11 албан шаардлагыг аймгийн Засаг дарга болон ОНӨГ, ГХБХБГ-т хүргүүллээ. Аудитын тайлангаар холбогдох байгууллагуудад 6 заалт бүхий зөвлөмжийг өгч аудитын шийдвэрийн мөрөөр үр дүнтэй арга хэмжээг авч, хэрэгжилтийг бодитой тооцож хариу ирүүлэх талаар шалгагдагч байгууллагын удирдлагууд болон мэргэжилтнүүдэд үүрэг чиглэл өглөө.