Архангай аймгийн Ихтамир сумын иргэдийн Төлөөлөгчдийн Хурлын төлөөлөгч нь төрийн жинхэнэ албан хаагч болсонтой холбоотойгоор иргэдийн Төлөөлөгчдийн Хурлын нөхөн сонгуулийг 2023 оны 06 дугаар сарын 29-ний өдөр зохион байгуулсан.
Аймаг, нийслэл, сум, дүүргийн иргэдийн төлөөлөгчдийн хурлын сонгуулийн тухай хуулийн 57 дугаар зүйлийн 57.1 дэх хэсэгт “Төрийн аудитын орон нутаг дахь салбар байгууллага зардлын тайланг хүлээн авсан өдрөөс хойш 60 хоногийн дотор хянаж, дүнг нийтэд мэдээлэх бөгөөд нэг сая ба түүнээс дээш төгрөгийн хандив өгсөн иргэн, хоёр сая ба түүнээс дээш төгрөгийн хандив өгсөн хуулийн этгээдийг нийтэд мэдээлнэ” гэж заасны дагуу Ихтамир сумын 32 дугаар тойргийн Иргэдийн төлөөлөгчдийн хурлын төлөөлөгчийн нөхөн сонгуульд оролцсон нам, эвсэл, нэр дэвшигчийн сонгуулийн зардлын тайланг хүлээн авч хяналаа.
Нөхөн сонгуульд Монгол Ардын намаас нэг нэр дэвшигч оролцсон ба өөр нам, эвсэл, бие даагч оролцоогүй байна. Сонгуульд оролцсон нам болон нэр дэвшигч нь “Аймаг, нийслэл, сум, дүүргийн иргэдийн төлөөлөгчдийн хурлын сонгуулийн тухай хууль”-ийн 56 дугаар зүйлийн 56.3 дахь хэсэг “Нам, эвсэл нь санал авах өдрөөс хойш 45 хоногт, нэр дэвшигч санал авах өдрөөс хойш 30 хоногт багтаан зардлын тайландаа хувийн аудитын хуулийн этгээдээр дүгнэлт гаргуулан, төрийн аудитын орон нутаг дахь салбар байгууллагад хүргүүлнэ” гэсний дагуу зардлын тайландаа “Мэргэн гүн аудит” ХХК-аар дүгнэлт гаргуулан ирүүлсэн бөгөөд нам, нэр дэвшигч нь зардлын данс нээлгээгүй, хандив аваагүй, сонгуулийн үйл ажиллагаатай холбоотой орлого, зарлагын гүйлгээ гаргаагүй байна.
