Төрийн аудитын байгууллагын “Удирдах ажилтны зөвлөгөөн-2023” арга хэмжээг 2023 оны 12 дугаар сарын 21-22-ны өдрүүдэд Улаанбаатар хотноо зохион байгууллаа.
Энэхүү “Удирдах ажилтны зөвлөгөөн-2023” арга хэмжээнд Үндэсний аудитын газрын зохион байгуулалтын бүтцийн нэгжийн дарга, захирлууд болон Аймаг, нийслэл дэх Төрийн аудитын газрын дарга, тэргүүлэх аудиторууд оролцсон юм.
“Удирдах ажилтны зөвлөгөөн-2023” арга хэмжээний нээлтэд Монгол Улсын Их хурлын гишүүн Төсвийн байнгын хорооны дарга Г.Тэмүүлэн хүрэлцэн ирж, “Төсөв санхүүгийн хяналт, хариуцлага эрх зүйн орчны өөрчлөлт” сэдэвт илтгэлээ танилцуулав. 2023 онд Төрийн аудитын байгууллагын бодлогоор гүйцэтгэсэн нийт 10 аудитын тайланг УИХ-ын байнгын хороодоор хэлэлцэн шийдвэрлэж, Засгийн газарт холбогдох чиглэлийг өгч ажилласан байна. Төсвийн тогтвортой байдлыг хангах, хяналт хариуцлагыг бэхжүүлэх чиглэлээр УИХ-ын Төсвийн байнгын хорооноос холбогдох хуулиудад нэмэлт, өөрчлөлт оруулсан бөгөөд цаашид төсөв санхүүгийн тогтвортой байдал, сахилга хариуцлагыг сайжруулахад Төрийн аудитын байгууллагын үүрэг, оролцоог улам илүүтэй нэмэгдүүлнэ гэдгийг Төсвийн байнгын хорооны дарга Г.Тэмүүлэн онцоллоо.
Монгол Улсын Ерөнхий аудитор Д.Занданбат “Төрийн аудитын хөгжлийн чиг хандлага, бодлогын хэрэгжилт, үйл ажиллагааны үр дүн” сэдвээр илтгэлээ танилцуулж, Аудитын дээд байгууллагуудын олон улсын байгууллагын тодорхойлсон хөгжлийн чиг хандлагад нийцүүлэн үйл ажиллагаагаа эрчимжүүлэх, төрийн аудитын үйл ажиллагаанд иргэдийн оролцоог хангах чиглэлд илүү анхаарч ажиллах шаардлагатайг дурдлаа.
Монгол Улсын Ерөнхий аудиторын Орлогчийн албан үүргийг түр орлон гүйцэтгэгч Ц.Наранчимэг “Төрийн аудитын байгууллагын 2023 оны зорилтын биелэлт, гүйцэтгэсэн аудит, үр дүн, 2024 оны ерөнхий чиглэл” сэдвээр, Үндэсний аудитын газрын Тамгын дарга, тэргүүлэх аудитор С.Цэрэнбаяр “Төрийн аудитын байгууллагын 2023 оны үйл ажиллагааны үр дүн” сэдвээр, Үндэсний аудитын газрын Хөгжлийн бодлого, төлөвлөлийн газрын захирал, тэргүүлэх аудитор Б.Бундхорол “Төрийн аудитын стратегийн хэрэгжилтийг дэмжсэн шийдвэр, түүний үр дүн” сэдвээр тус тус илтгэлээ танилцуулав.
Зөвлөгөөнд Үндэсний аудитын газрын Гүйцэтгэл-нийцлийн аудитын газраас “Гүйцэтгэлийн аудитын чадавхыг бэхжүүлэх асуудлууд” сэдвийн хүрээнд хэлэлцүүлэг явуулсан бөгөөд мөн Аудитын нэгдсэн удирдлага, зохицуулалтын газрын захирал, тэргүүлэх аудитор Я.Самбууням, Мэдээллийн технологийн төвийн захирал А.Уянга-Эрдэнэ нар “Аудитын шийдвэр гаргалтыг дэмжих мэдээллийг цахимаар цуглуулж боловсруулах, аудитад ашиглах” сэдвээр илтгэл танилцуулж, хэлэлцүүлэг удирдан явууллаа.
Төрийн аудитын байгууллагын “Удирдах ажилтны зөвлөгөөн-2023” арга хэмжээний үеэр Монгол Улсын Ерөнхий аудитор Аймаг, нийслэл дэх Төрийн аудитын газрын дарга, тэргүүлэх аудиторуудтай 2024 оны гүйцэтгэлийн төлөвлөгөө батлах ёслол болсон юм.
Монгол Улсын Ерөнхий аудитор Д.Занданбат Төрийн аудитын байгууллага 2023 оны үйл ажиллагаагаа дүгнэн ярилцаж, ирэх 2024 оны зорилго, зорилтоо дэвшүүлж, цаашдын бодлого чиглэлээ тодорхойлсон үр дүнтэй зөвлөгөөн болсныг энэ удаагийн “Удирдах ажилтны зөвлөгөөн-2023” арга хэмжээний төгсгөлд онцлон тэмдэглэлээ.
