Үндэсний аудитын газар нь Газрын тосны салбарт бүтээгдэхүүн хуваах гэрээгээр олборлолтын үйл ажиллагаа явуулсан гэрээлэгч “Доншен газрын тос (Монгол)” ХХК-ийн 2022, 2023 оны нийт хөрөнгө оруулалт, өртөг нөхсөн болон нөхөх зардлын хэмжээ, газрын тосны экспорт, борлуулалтын орлогын тооцоо, хуваарилалтад баталгаажуулалт хийх аудитад зөвлөх үйлчилгээ үзүүлж, дүгнэлт гаргах гүйцэтгэгчийг сонгон шалгаруулж, гэрээ байгуулахаар төлөвлөж байгаа тул сонгон шалгаруулалтад оролцох хүсэлтэй хуулийн этгээдийг саналаа ирүүлэхийг урьж байна.
Аудитыг гүйцэтгэх хуулийн этгээд нь Монгол Улсын Ерөнхий аудиторын баталсан аудитын төлөвлөгөөний дагуу ажлын даалгаварт заасан ажлыг журам, АДБОУС болон холбогдох бусад баримт бичигт нийцүүлэн цаг хугацаанд нь чанартай хийж гүйцэтгэх үүрэгтэй.
Бэлтгэсэн ажлын баримт материалд тулгуурлан ажлын даалгаварт тусгасан ажлыг гүйцэтгэж, аудитын гүйцэтгэлийн болон тайлагналын үе шатны дэд тайлан бэлтгэнэ. Үүнд:
- Гэрээлэгчийн олборлосон тосны хэмжээ /баррель/, экспортолсон газрын тосны хэмжээ /баррель/, борлуулалтын орлогын хэмжээ /ам.доллар/, борлуулалтын зардлын дүн, тоо хэмжээг тус тус баталгаажуулах
- Орд ашиглалтын үйл ажиллагаатай холбоотой хөрөнгө оруулалтын зардал, үйлчилгээ, бараа материал, цалин, даатгал, оффис, бааз агуулахын зардал, үйл ажиллагаа, тээвэр, борлуулалт, хуулийн болон өртөг нөхөгдөх зардлын тайланд тусгасан бусад зардлыг баталгаажуулах
- “Доншен газрын тос (Монгол)” ХХК-ийн борлуулалтын орлогын журналыг нэхэмжлэх, дансны хуулгаар орлогоос Монгол Улсын Засгийн газарт зөв хуваарилсан эсэхийг хянан баталгаажуулах
- Гэрээлэгчийн ажлын жилийн төлөвлөгөө, төсвийг баталж, түүний гүйцэтгэлд хяналт тавьсан эсэхэд дүгнэлт гаргах
- Гэрээлэгчийн нийт хөрөнгө оруулалт, өртөг нөхсөн болон нөхөгдөх зардлын хэмжээ, газрын тосны экспорт, борлуулалтын орлогын тооцоо, хуваарилалттай холбоотой тайлан мэдээг хүлээн авч, хяналт тавьсан эсэхэд дүгнэлт гаргана.
Аудитыг гүйцэтгэх хуулийн этгээд дараах шаардлагыг хангасан байна. Үүнд
- Баталгаажуулалт, Аудит, Нягтлан бодох бүртгэл, зөвлөх үйлчилгээ үзүүлэх тусгай зөвшөөрөлтэй байх;
- Аудиторууд нь мэргэжлийн ёс зүйн зөрчилгүй байх;
- Үйл ажиллагаа явуулах ажлын байр, техник хэрэгсэлтэй байх;
- Англи, Хятад зэрэг гуравдагч орны хэл дээр үйлдэгдсэн санхүүгийн анхан шатны материалыг Монгол хэл рүү хөрвүүлж ашиглах чадвартай байх;
- Аудитын багийн гишүүд нь үйлчлүүлэгчийн эрх бүхий аль нэг албан тушаалтантай хамааралгүй байх;
- Өртөг нөхөгдөх зардалд аудит хийж байсан туршлагатай бол давуу тал болно.
Хүний нөөцийн шаардлага:
- 6-аас доошгүй үндсэн орон тоотой, мэргэшсэн нягтлан бодогчтой байх;
- Аудитын байгууллагад ажилладаг мэргэшсэн нягтлан бодогч өөр байгууллагад давхар ажил эрхлэх, бусад аудитын хуулийн этгээдэд гэрээгээр ажилладаггүй байх;
- Англи, Хятад зэрэг гуравдагч орны хэл дээр үйлдэгдсэн санхүүгийн анхан шатны материалыг Монгол хэл рүү хөрвүүлж ашиглах чадвартай багадаа 1 ажилтантай байх;
- Гэрээгээр гүйцэтгэж байсан бусад ажлын жагсаалт.
Монгол Улсын холбогдох хууль тогтоомжийг үйл ажиллагаандаа мөрдлөг болгон гэрээ, ажлын даалгаварт заасан ажлыг мэргэжлийн болон чанарын өндөр түвшинд хийж шаардлагатай судалгаа, шинжилгээ, тооцоо, тайлан бусад ажлыг хугацаанд нь үнэн зөв чанартай хийж гүйцэтгэнэ.
Сонгон шалгаруулалтын дэлгэрэнгүй жагсаалтад материалаа ирүүлэх хуулийн этгээд дээрх тавигдсан шаардлагыг хангасан байх /шаардлага хангасан нотлох баримтыг эхний шатад ирүүлэх шаардлагагүй/ ба тус ажлыг гүйцэтгэхээ илэрхийлсэн албан хүсэлт ирүүлэхээс гадна дараах мэдээллийг эхний шатанд ирүүлнэ. Үүнд:
Хуулийн этгээд:
- Улсын бүртгэлийн гэрчилгээний хуулбар
- Тусгай зөвшөөрлийн гэрчилгээний хуулбар
- Татварын тодорхойлолт /цахим, хугацаа хэтэрсэн өр төлбөргүй байх/
- Нийгмийн даатгалын тодорхойлолт /цахим, хугацаа хэтэрсэн өр төлбөргүй байх/
- ШШГЕГ-ын хугацаа хэтэрсэн өр төлбөргүй талаарх тодорхойлолт
- Шүүхийн төрөлжсөн архивын тодорхойлолт
- ММНБИ-ын тодорхойлолт
- Гүйцэтгэсэн адил төстэй зөвлөх үйлчилгээний мэдээлэл /сүүлийн 3 жилээр/
- Үндсэн ажилтны анкет, боловсрол, мэргэшлийн гэрчилгээний хуулбар
- Үндсэн ажилтны нийгмийн даатгалын цахим лавлагаа /сүүлийн 1 жилээр/
- Санхүүгийн тайлан /сүүлийн 2 жилээр/
Сонирхсон этгээд нь саналын урилгын баримт бичигт тусгагдсаны дагуу саналаа боловсруулж, 2024 оны 08 дугаар сарын 02-ны 17:30 минутаас өмнө /byambasurenb@audit.gov.mn info@audit.gov.mn/ хаягаар ирүүлнэ үү. Саналыг цахим pdf файлаар нэгтгэн /PDF файлыг 25MB-аас ихгүй ирүүлэх ба файл заасан хэмжээнээс илүү гарсан бол файлыг хуваах/ ирүүлнэ.
Хаяг:
Улаанбаатар хот, Чингэлтэй дүүрэг, Бага тойруу-3 Засгийн газрын IV байр 305 тоот
Санхүү хөрөнгө оруулалтын хэлтсийн Худалдан авах үйл ажиллагаа хариуцсан шинжээч Б.Бямбасүрэн +976-51-261745, 99641235
Үндсэн хуулийн өдрийг тохиолдуулан зохион байгуулсан танин мэдэхүйн АХА тэмцээнд нягтлан бодогч О.Мягмарсүрэн амжилттай оролцлоо.
![](https://audit.mn/wp-content/uploads/2020/09/news-pic.png)
Монгол Улсын Их Хурлын Тамгын газраас аймгийн иргэдийн Төлөөлөгчдийн Хурлын…